Në heshtje dhe me krahë hapur, Papa lutet në portin e Bejrutit

R.SH. / Vatikan

Sot në ditën e fundit të shtegtimit apostolik në Liban, pasi vizitoi spitalin de la Croix, Papa mbërriti në Portin e Bejrutit për t'u lutur në vendin e shpërthimit të dyfishtë që vrau mbi 200 persona më 4 gusht 2020. 7.000 persona u plagosën dhe afërsisht 300.000 u zhvendosën. Sipas ekspertëve, shpërthimi që ndodhi në vitin 2020 në Portin e Bejrutit ishte një nga shpërthimet më të fuqishme jo-bërthamore në historinë e njerëzimit.

Ngjarja mbetet një mister: asnjë hetim nuk ka hedhur dritë mbi shkaqet e sakta të kësaj tragjedie të madhe. Në muajt e fundit, dita e kësaj tragjedie, 4 gushti, është shpallur ditë zie kombëtare në Liban, dhe një rrugë e kryeqytetit është emëruar sipas viktimave të 4 gushtit 2020 dhe vendi i shpërthimit është shpallur si një vend me rëndësi historike.

Një heshtje elokuente, që flet më shumë se fjalët. Kjo është ajo që karakterizoi lutjen e heshtur të Papës në vendin e shpërthimit të dyfishtë në Portin e Bejrutit, shpërthimi më i madh jo-bërthamor në histori, i cili shkaktoi 220 të vdekur. Një traumë për popullin libanez, i cili, pesë vjet pas atij 4 gushti 2020, ende nuk e di të vërtetën për ngjarjen tragjike dhe kërkon drejtësi.

Leoni XIV, i pritur nga kryeministri i Libanit, ndaloi shkurt për një moment lutjeje, në heshtje, para monumentit që përkujton viktimat e shpërthimit, në këmbët e të cilit vendosi një kurorë dhe ndezi një qiri, pastaj bekoi vendin. Në fund të përkujtimit, Papa përshëndeti disa të afërm të viktimave dhe disa të mbijetuar nga shpërthimi.