Papa udhëheqësve fetarë: libanezët kërkojnë stabilitet dhe drejtësi, le të punojmë për paqen

R.SH. – Vatikan

Në takimin ekumenik dhe ndërfetar me Papën në Sheshin e Dëshmorëve të Bejrutit, simbol i rezistencës libaneze gjatë kryengritjes kundër turqve në Luftën e Parë Botërore dhe një nga pikat kryesore të protestave antiqeveritare në vitin 2019, Patriarku Katolik Siriak, Ignatius Youssif III Younan,në fjalën e tij të mirëseardhjes drejtuar,para së gjithash, shpreson "që vizita e tij të ndihmojë në vendosjen e paqes dhe stabilitetit" në Liban dhe në vende të tjera të Lindjes së Afërt, dhe kujton se ajo "përkon me dy ngjarje historike": 1700-vjetorin e Koncilit të Nikesë, në përkujtim të të cilit Kishat libaneze "organizuan takime ekumenike" dhe 60-vjetorin e dokumentiët Koncilit të Dytë të Vatikanit Nostra Aetate dhe "thirrjes së saj për dialog ndërfetar". "Popujt tanë, mbi të gjitha, dëshirojnë stabilitet politik, paqe konstruktive dhe vëllazëri autentike njerëzore midis të gjithë qytetarëve", tha Patriarku sirako-katolik, i bindur se prania e Leonit XIV "do të na inkurajojë të forcojmë" "angazhimin për të jetuar së bashku në një frymë dialogu të sinqertë ndërfetar, duke thënë të vërtetën me bamirësi dhe respekt të ndërsjellë", në besnikëri ndaj rrënjëve të tyre. Nga këtu edhe angazhimi "për të ecur së bashku", "të frymëzuar nga shpresa" dhe "për t'u bërë ndërtues të paqes autentike në Liban dhe në të gjitha vendet e Lindjes së Mesme".

"Lum paqebërësit"

Përshëndetjen e Patriarkut sirako-katolik pasohet nga kënga nga Ungjillit dhe ajo e Kuranit, ndjekur nga një shfaqje e një reportazhi të titulluar "Lum paqebërësit", që paraqet iniciativa, përvoja dhe histori jete që demonstrojnë se si bashkëjetesa e feve të ndryshme, si ajo e përjetuar në Liban, "është një përvojë e pasur për të gjithë njerëzimin". Videoja shpreh shpresën se, pas disa konflikteve, vendi mund të arrijë një "pastrim të plotë të kujtesës", një "shërim të kujtesës libaneze nga lufta". Shpresa është që vizita e Leonit XIV "do të jetë vërtet një shtysë për këtë udhëtim për të ndërtuar një të ardhme të qëndrueshme". Videoja paraqet një sërë njerëzish që rrëfejnë jetën e tyre të përditshme, të krishterë dhe myslimanë që jetojnë krah për krah dhe ëndërrojnë për një dialog më të gjerë, një bashkëjetesë më paqësore. Ndër iniciativat që synojnë përmirësimin e saj, videoja ilustron një program për edukimin aktiv të qytetarisë që përqafon diversitetin në shkolla.

Përhapja e mesazhit të Dokumentit mbi Vëllazërinë Njerëzore

Gjashtë udhëheqës fetarë më pas folën me radhë. Sheikh Abdullatif Darian, myftiu i Republikës së Libanit, një udhëheqës sunit, theksoi se Toka e Kedrave është kombi "i bashkëjetesës dhe pluralizmit dhe diversitetit fetar", dhe se Muhamedi, në Kuran, shkruan se Zoti ka përcaktuar "praktikimin e fesë dhe jo ndarjen e unitetit të saj". Pastaj ai kujtoi mikpritjen që myslimanët morën nga Negusi, mbreti i krishterë i Abisinisë, dhe Paktin e Medinës, i cili, në themelimin e shtetit të parë islamik, "vendosi që besimtarët hebrenj dhe të krishterë, së bashku me myslimanët, përbëjnë një komb të vetëm". Ai gjithashtu përmendi edhe Dokumentin mbi Vëllazërinë Njerëzore, të nënshkruar në vitin 2019 nga Imami i Madh i Al-Azharit, Ahmed al-Tayyib, dhe Papa Françesku, duke nënvizuar mesazhin e tij. "Ne e konsiderojmë veten të ngarkuar bashkërisht, fetarisht, moralisht dhe si komb, për të çuar përpara pishtarin e këtij mesazhi - përfundon ai -, në mënyrë që siguria dhe paqja të mbizotërojnë në botë dhe dashuria të mbretërojë midis të gjitha kombeve dhe popujve".

Toka e Kedrave: urë Midis Lindjes dhe Perëndimit

Duke folur jashtë tekstit të përgatitur, Katholikos Aram I, duke përfaqësuar Ortodoksët Armenë në takimin që u mbajt në Sheshin e Dëshmorëve në Bejrut, ripohoi pasurinë që vjen nga takimi i diversitetit në Tokën e Kedrave. Ai vuri në dukje se diversiteti manifestohet në unitet, i cili ruan dhe pasuron këtë diversitet në shërbim të një Libani të bashkuar, sovran dhe të pavarur. Për udhëheqësin ortodoks armen, brenda kombit, "bashkëjetesa myslimano-kristiane përbën themelin", "tiparin dallues" të vendit të tij, dhe nga ana tjetër, "uniteti në diversitet dhe fryma e bashkëjetesës" që e dallojnë Libanin e bëjnë atë "një urë midis Lindjes dhe Perëndimit". Sfida me të cilën përballet populli libanez është të ruajë diversitetin e tij "dhe të ruajë bashkëjetesën e fortë myslimano-kristiane, duke thelluar dhe artikuluar konkretisht" unitetin kombëtar.

Bota duhet të ndihmojë Libanin të çlirohet nga krizat e akumuluara

Nënkryetari i Këshillit të Lartë Islamik Shiit, Sheikh Ali El-Khatib, shpreson që qëndrimi i Papës do të çojë në "forcimin e unitetit kombëtar të lëkundur në këtë vend, të rrënuar nga agresioni i vazhdueshëm izraelit kundër popullit dhe tokës së tij". "Kultura jonë shpirtërore është e themeluar mbi vëllazërinë njerëzore", shton ai, duke shpjeguar se pasardhësi i Muhamedit, Imam Ali ibn Ab Talibi, deklaroi mbi natyrën e marrëdhënieve njerëzore se njerëzit duhet të konsiderohen ose "vëllezër në fe" ose "të ngjashëm në krijim". Udhëheqësi shiit gjithashtu saktëson se Islami e konsideron diversitetin pjesë të natyrës njerëzore dhe mëson "se marrëdhëniet midis njerëzve të ndryshëm qeverisen nga dialogu, mirëkuptimi i ndërsjellë dhe bashkëpunimi në mirësi dhe devotshmëri; dhe se bashkëjetesa paqësore midis ndjekësve të feve të ndryshme është rregulli dhe themeli, dhe se ajo që ndodh me luftërat artificiale në emër të feve nuk shpreh të vërtetën e fesë, e cila është e themeluar para së gjithash mbi shenjtërinë dhe dinjitetin e njeriut". "Le ta vendosim çështjen e Libanit në duart e tij", përfundon Sheikh Ali El-Khatib, duke iu drejtuar Leonit XIV, duke shpresuar se "bota mund ta ndihmojë" vendin të çlirohet nga krizat e akumuluara.

Shpresa për një Paqe të Bazuar në Drejtësi

Në fjalën e tij drejtuar Papës, Patriarku i Antiokisë e Gjithë Lindjes dhe Kryetari Suprem i Kishës Ortodokse Siriane në mbarë botën, Mar Ignatius Ephraim II, nga ana tjetër, nuk e fsheh faktin se në vitet e fundit, në vendet e Lindjes së Mesme, "myslimanët dhe të krishterët janë bërë viktima" të fushatave terroriste dhe luftërave që kanë çuar në migrim të detyruar, "sfida" që kanë "forcuar bashkëpunimin midis Kishave të ndryshme" dhe kanë çuar në atë që Papa Françesku e ka quajtur "ekumenizmi gjakut". Duke përfaqësuar ndjenjat e përbashkëta të popullit, Patriarku Ortodoks Sirian specifikon se të gjithë shpresojnë për "stabilitet, drejtësi dhe paqe", "një paqe të bazuar në drejtësi, e cila mbron dinjitetin dhe lirinë njerëzore, në një shtet të qeverisur nga ligji dhe të bazuar në barazi në të drejta dhe detyra". Ai vëren se të krishterët dhe myslimanët kanë jetuar së bashku për shekuj në Liban, duke bashkëndarë "pikëllimin dhe shpresën" dhe dëshirën "për të vazhduar të jetojnë së bashku". "Dhe ndërsa dialogu akademik midis përfaqësuesve fetarë është i rëndësishëm, përvoja e jetës reale mbetet elementi më i rëndësishëm në forcimin e tij". Mar Ignatius Ephraim II shton se në Liban, të krishterët dhe myslimanët kanë mësuar se bashkëjetesa është në thelb "një dialog jete i bazuar në takim të sinqertë dhe respekt të ndërsjellë" dhe se "takimi midis bijve të feve të ndryshme mund të ndërtojë një shoqëri kohezive të aftë për t'u përballur me fanatizmin dhe përçarjen, dhe për të frymëzuar shpresën". Në Kombin e Kedrave, "Kisha e Libanit dhe Lindjes mbetet një dëshmitare e ndërgjegjes njerëzore, duke bërë thirrje për dialog të hapur, respekt për lirinë fetare dhe mbrojtjen e dinjitetit të çdo personi", përfundon Patriarku Mar Ignatius Ephraim II, i sigurt se Papa do të mbajë në zemrën e tij "vuajtjet e kësaj pjese të Lindjes së munduar" dhe do të punojë "për t'i lehtësuar ato dhe për të garantuar një jetë të lirë dhe dinjitoze për të gjithë bijtë e saj".

Hapja e Dyerve për Dashuri dhe Mëshirë

Në fjalimin e tij, Sheikh Al-Aql i komunitetit Druze, Sami Abi Al-Muna, tregon Libanin si një model të diversitetit në unitet. "Jemi të bindur se kombi ynë duhet të ndërtohet vetëm mbi themele të forta dhe të forta morale, të cilat kërkojnë që çdo familje shpirtërore të mbrojë partnerin e saj në atdheun e saj", pohon udhëheqësi Druz. Ai është i bindur se takimi i sotëm midis të krishterëve dhe myslimanëve mund të “krijojë një shkëndijë shprese në klimën aktuale të errët” dhe se Papa i fton të gjithë “të hapin dyert e dashurisë dhe mëshirës”, të dashurisë së krishterë dhe mëshirës islame, në mënyrë që zëri i paqes të jetë më i fortë se zëri i luftës.