Papa Leoni XIV: ndjeti i lutjes për vitin 2027
R.SH. / Vatikan
Më poshtë, ndjeti i lutjes që Ati i Shenjtë Leoni XIV ia besoi Rrjetit Papnor Global të Lutjes për vitin 2027:
Janar
Për zbulimin e forcës së lutjes. Të lutemi që të gjithë ne, në Kishë, të zbulojmë fuqinë e lutjes si takim vetjak me Zotin, i cili i shndërron zemrat tona dhe botën.
Shkurt
Për kujdesin e atyre, që i ndihmojnë të tjerët. Të lutemi për ata që kujdesen për shëndetin e plotë të të tjerëve: që ata të kenë mbështetjen e nevojshme dhe, me durim, urti e forcë, të jenë në gjendje për të hapur shtigjet e shërimit, të shpirtit e të shpresës.
Mars
Për respektin e dinjitetit të jetës njerëzore. Të lutemi që, përballë kulturës së përqendruar mbi prodhimin dhe shpejtësinë, të mund të njohim dhe të vlerësojmë dinjitetin unik të çdo njeriu: si tonin, ashtu edhe të të tjerëve.
Prill
Për artin, dhuratë që humanizon. Të lutemi që arti të mirëpritet si dhuratë e vërtetë e që na bën më njerëzorë, na larton shpirtin dhe na ndihmon të sodisim bukurinë e Zotit në krijim.
Maj
Për mundësi pune për të gjithë. Të lutemi që zhvillimi teknologjik të hapë shtigje për punë dinjitoze dhe që bashkëpunimi ndërmjet brezave të mundësojë një të ardhme në të cilën çdo njeri të mund të ofrojë talentet e tij, në shërbim të së mirës së përbashkët.
Qershor
Për përdorimin e mirë të inteligjencës artificiale: të lutemi që zhvillimi i inteligjencës artificiale të jetë gjithmonë në shërbim të dinjitetit njerëzor e që ne të dimë ta përdorim me urti.
Korrik
Për gjyshërit dhe të moshuarit. Të lutemi që të gjithë ne, anëtarë të Kishës, ta vlerësojmë thesarin e fesë dhe të mençurisë që na ofrojnë gjyshërit e të moshuarit, të gatshëm të mësojmë nga përvoja e tyre.
Gusht
Për thirrjen e të rinjve. Të lutemi që të rinjtë, në kërkim të thirrjes së tyre, të njohin në Jezu Krishtin shoqëruesin, në udhëtim të cilit mund t'i hapin zemrat.
Shtator
Për kthesën e plotë ekologjike: të mësohemi të jetojmë një marrëdhënie të re me krijimin, duke e mbrojtur atë me drejtësi dhe duke gjetur në soditjen e krijimit, rrugën drejt një jete më të harmonishme e mirënjohëse.
Tetor
Për bashkësitë e krishtera: të lutemi që çdo famulli, bashkësi a grup i krishterë të jetë qendër e shtrirjes misionare, duke formuar dishepuj të rinj në shërbim të Ungjillit.
Nëntor
Për integrimin e migrantëve. Të lutemi që migrantët dhe njerëzit e zhvendosur, të shoqëruar dhe të ngushëlluar nga Familja e Shenjtë në udhëtimin e tyre të largimit, të gjejnë bashkësi që i mirëpresin me dinjitet, solidaritet dhe integrim të vërtetë.
Dhjetor
Për thirrjen e krishterë të familjes. Të lutemi që familjet e krishtera të jenë dëshmitare të gjalla të Ungjillit në shoqëri, duke mësuar gjithnjë e më shumë të jenë shtëpi ku ushqehet feja, shpresa dhe dashuria.
