Papa bën thirrje për mbrojtjen e tokës: kujdesi për paqen është kujdes për jetën.

R.SH. / Vatikan

“Duhet të kujdesemi për krijimin, për Planetin, sepse kjo sjell harmoni”. E kjo ishte ftesa e Papës Leoni XIV sot, 17 maj, në fund të lutjes së Mbretëreshës Qiellore në Sheshin e Shën Pjetrit, para 20,000 vetëve. Frymëzimi për Javën Laudato Si', e cila filloi sot, me temën e këtij viti "Nga Shpresa në Veprim", i nxit besimtarët dhe bashkësitë të kalojnë nga fjalët - në veprime konkrete për të mbrojtur mjedisin. "Në këtë Vit Jubilar të Shën Françeskut të Asizit", duke përmendur iniciativën, Papa Leoni XIV kujtoi "mesazhin e tij të paqes me Zotin, me vëllezërit, me motrat e me të gjitha krijesat".

Fatkeqësisht, vitet e fundit, për shkak të luftërave, progresi në këtë fushë u ngadalësua shumë. Prandaj, i inkurajoj anëtarët e Lëvizjes Laudato Si' dhe të gjithë ata që punojnë për një ekologji integrale, ta ripërtërijnë angazhimin e tyre.

E frymëzuar nga Enciklika Laudato Si' e Papës Françesku, Java me të njëjtin emër lindi gjashtë vjet më parë për të festuar përvjetorin e pestë të dokumentit "Mbi kujdesin për shtëpinë tonë të përbashkët". Propozohet çdo maj në pesë kontinente, ku organizohen nisma të ndryshme për të prekur ndërgjegjësimin e për të sensibilizuar respektin për Tokën, që Leoni XIV e inkurajoi duke zgjeruar mendimin për të përfshirë mbarë njerëzimin.

Kujdesi për paqen, është kujdes për jetën!

E nxitur nga Dikasteri i Vatikanit për Shërbimin e Zhvillimit Integral Njerëzor, Java Laudato Si' e këtij viti synon të kujtojë se ndryshimet ekologjike rriten hap pas hapi, përmes rivendosjes së marrëdhënieve, mbrojtjes së krijimit dhe forcimit të bashkësive.