Papa Kishës së San Marinos: përballë dhunës e frikës, të zgjedhim solidaritetin dhe faljen

Vatican News

Përvojat e afërsisë dhe të solidaritetit që janë "në dukje të vogla dhe margjinale" mund të kenë "vlerë të madhe profetike", "në një botë të plagosur nga shumë konflikte, ku jemi të alarmuar kur shohim rritjen e dhunës, izolimit dhe frikës nga të tjerët". Ky është inkurajimi që Leoni XIV u dha sot, 22 gusht, priftërinjve, personave të shenjtëruar, besimtarëve fetarë dhe të gjithë bashkësisë kishtare të San Marinos-Montefeltro, duke i takuar ata në bazilikën dioqezane gjatë vizitës së tij baritore në republikën më të vjetër në botë.

Përballë këtyre trendeve shqetësuese, përgjigjja jonë mund të jetë vetëm të ecim me bindje edhe më të madhe në rrugën e Ungjillit (...) i cili mëson dhe urdhëron vëmendjen ndaj më të dobëtve, faljen, bashkimin, solidaritetin.

Të rinjtë dhe dritarja drejt pafundësisë

Duke mbërritur në hyrje të Bazilikës rreth orës 11:45 të paradites - pasi vizitoi Palazzo Pubblico - Papa u prit nga Imzot Domenico Beneventi, Ipeshkvi i San Marino-Montefeltro, dhe nga Ati Marco Mazzanti, rektor i Bazilikës. 

Në letrën e tij enciklike Magnifica Humanitas - duke cituar shkrimtarin katolik J.R.R. Tolkien, autor i veprës “Zoti i Unazave” - Papa paralajmëroi rrezikun e pranimit të "tundimit delikat" të të menduarit se vetëm ata që "qeverisin" ose "udhëheqin institucionet" kanë përgjegjësi ndaj botës. Në realitet, argumentoi Papa, "askush nuk është pa përgjegjësi". Të gjithë duhet të zgjedhin ndërmjet "ushqimit të logjikës së forcës ose ruajtjes së logjikës së paqes".

Leoni XIV i kërkon bashkësisë kishtare të San Marinos, secilit sipas rolit të tij, këtë angazhim të përditshëm, të përbërë, siç pohon enciklika e tij Magnifica Humanita, nga "besnikëria e vogël dhe këmbëngulëse". Ati i Shenjtë u drejtohet "para së gjithash" të rinjve, duke cituar fjalët profetike dhe poetike të Papës Benedikti XVI, të thëna në vitin 2011 në San Marino, kur i ftoi ata “ta mbajnë hapur dritaren drejt pafundësisë".

Ndiqni me shikimin e shpirtit tuaj shtigjet e trasuara brenda jush nga dëshirat e mëdha për bukuri, mirësi dhe jetë që mbani në zemrën tuaj. Nëse i vëzhgoni me kujdes shtigjet e tyre dhe dëgjoni zërin e tyre, ata do t'ju ngrenë lart, në një takim me Zotin, ku Ai ju kërkon dhe ju pret.

Të rinjtë duhet së pari ta kuptojnë thirrjen e tyre dhe pastaj ta përqafojnë misionin e tyre në botë "me entuziazëm". Ata nuk duhet të kenë frikë të bëjnë "zgjedhje të vështira, të tilla si martesa, kushtimi, shërbesa e shuguruar, jeta profesionale, angazhimi shoqëror dhe politik". Papa i nxiti të rinjtë të “përfshihen” në projekte bamirësie dhe drejtësie, duke kontribuar kështu - siç thotë motoja e zgjedhur për vizitën e tij në Republikën e San Marinos - në “një dëshmi paqeje, që i flet botës”.

Forcimi i paktit ndërmjet familjeve, priftërinjve dhe edukatorëve

Pastaj Papa falënderoi meshtarët, katekistët dhe të gjithë edukatorët e dioqezës, të themeluar tetëmbëdhjetë shekuj më parë nga Shenjtorët Marino dhe Leoni mbi “parimet e krishtera të lirisë, respektit të ndërsjellë dhe bashkësisë” - vlera, vëren Papa, që bashkësitë kishtare dhe civile i mbështesin edhe sot “me të njëjtin entuziazëm dhe të njëjtën besnikëri”. “Është një vepër e fshehur, por shumë e rëndësishme” për ata që kujdesen për “rritjen njerëzore dhe të krishterë të fëmijëve”. Ky shërbim është “i përvuajtur dhe i çmuar” sepse mbështet prindërit në misionin e tyre për të edukuar fëmijët në fe: familja, thekson Leoni XIV, është mitra natyrore në të cilën “Ungjilli mësohet dhe merr frymë çdo ditë”.

Për këtë arsye, kujdesi i mençur baritor do të nxisë një sinergji të fortë formuese ndërmjet familjeve dhe bashkësive kishtare, një pakt edukativ, në mënyrë që prindërit të ndihen të përfshirë, të rizbulojnë besimin e tyre në një mënyrë të re dhe të kenë gëzimin e transmetimit tek bijtë e tyre të vlerave të krishtera që  trashëguan.

Dhurata e Takimit me Krishtin

Nga një perspektivë e përmbajtjes, "shtigjet e rritjes" të promovuara nga meshtarët dhe katekistët duhet të përqendrohen, theksoi Papa Leoni XIV, para së gjithash në "bukurinë dhe gëzimin e jetës pagëzore", në mënyrë që të forcojnë "shtigjet e shenjtërisë brenda komuniteteve" dhe të nxisin vetëdijen në rritje për "dinjitetin e tyre profetik, meshtarak dhe mbretëror". Shpallja e Ungjillit - "rruga e lirisë për burrat dhe gratë e të gjitha kohërave" - ​​dhe ndihma e njerëzve që takojnë njeriun e bërë nga Perëndia, janë "dhuratat më të mëdha që mund të japim".

Në këtë dritë, praktikojmë bamirësinë në të gjitha format e saj, pa kursim, por gjithmonë duke pasur parasysh e me shqetësim të thellë, të mirën përfundimtare dhe integrale të njerëzve që mbështesim.

"Flakëza" që e mundë individualizmin

"Mbështetja e ndërsjellë" dhe "afërsia" e ofruar "komuniteteve të vogla" në "zonat më të brendshme të këtij territori", të cilat po përballen me "shpopullim" dhe "mungesë shërbimesh", kanë rëndësi të madhe, theksoi Papa. Këto dëshmi të afërsisë janë si "flaka të vogla" që mund të përdoren gjithmonë për të rindezur "zjarrin e vlerave të forta", të cilat mbajnë gjallë ngrohtësinë e asaj magnifica humanitas drejt së cilës është "e nevojshme të përpiqemi", për të kapërcyer "individualizmin", "kulturën metropolitane dhe konsumiste"  si dhe "mosbesimin dhe provincializmin". Një angazhim i përditshëm, shtoi Papa, që i rikthen oksigjenin “shpresave tona për vëllazëri dhe paqe”.

Këto parime dhe qëndrime janë të rrënjosura gjenetikisht në Republikën e vogël, themeluesit e së cilës ishin në gjendje ta “mishëronin mesazhin e Ungjillit në një model të ri komunitar dhe politik, të karakterizuar fuqishëm nga parimet e krishtera të lirisë, respektit të ndërsjellë dhe bashkimit, model që mbetet gjallë edhe sot e kësaj dite”.

Duke ia besuar realitetin kishtar të San Marinos ndërmjetësimit të Shenjtorëve Marino dhe Leoni si dhe duke i siguruar ata për kujtimin e tyre e në lutjet personale, Papa në fund porositi vëmendjen ndaj vlerës së "bashkimit": që duhet të kultivohet ndërmjet famullive kishtare, ndërmjet barinjve e besimtarëve, si dhe ndërmjet "karizmave dhe shërbesave të ndryshme", në mënyrë që ta dëshmojë gjithnjë unitetin. Leoni XIV mori si dhuratë një faksimile të dorëshkrimit të "Jetëve të Shenjtorëve Marino dhe Leoni", ndërsa dhuroi një këlshejt argjendi.

Papa u kërkon të rinjve bujari dhe shërbim

Duke dalë nga Bazilika, Papa u ndalua edhe një herë për të përsëritur mesazhin e tij për të rinjtë:

Njiheni në veten tuaj vlerën e jetës, vlerën e jetës suaj, të krijuar nga Zoti, të dashur nga Zoti. Jeta juaj ka kaq shumë vlerë: për ne, për Kishën, për familjen tuaj, për të gjithë botën. Besoni në atë që Zoti ka krijuar, sepse ju të gjithë jeni bij dhe bija të Zotit dhe Zoti ju do. E të jetosh me këtë ndjenjë dashurie në zemrën tënde do t'ju japë gjithçka që ju nevojitet gjatë gjithë jetës suaj. Jini bujarë, jini gjithmonë të hapur për t'u shërbyer të tjerëve, kërkoni të krijoni miqësi autentike. Në miqësi, ne mund të formojnë komunitete.

Më pas Leoni XIV thekson përputhshmërinë e parimeve mbi të cilat është themeluar Republika e San Marinos me mesazhin e Ungjillit për lirinë.

Këtu në San Marino, keni një moto kaq të bukur, një fjalë të vetme: "Libertas". Me siguri e keni dëgjuar shumë herë. Ne gjejmë liri autentike vetëm në Jezu Krishtin, e gjejmë atë në të vërtetën: Jezusi erdhi, ai erdhi për të na dhënë jetë, ai erdhi për të na ndihmuar të njohim të vërtetën në një botë të mbushur kaq shpesh me gënjeshtra, plot mashtrime.

Përkrah Papës, për dinjitetin e njeriut

Angazhimi i të gjithë dioqezës së San Marinos Marino-Montefeltro - një Kishë lokale që shtrihet në territoret e dy Republikave, Italisë dhe San Marinos - është e përqendruar pikërisht në sfidën e "mbajtjes gjallë të ndjenjës së bashkësisë së një populli të mbledhur nga feja", siç e përsëriti Ipeshkvi imzot Domenico Beneventi në përshëndetjen e tij drejtuar Papës, pas adhurimit të Shenjtueshmit Sakramentit të Eukaristisë dhe nderimit të relikeve të Shën Marinos, të ruajtura në Bazilikë. "Këtu," vazhdon ai, "ku bukuria e fshatrave dhe territoreve bashkohet me bujarinë e marrëdhënieve, ne mësojmë çdo ditë vlerën e afërsisë dhe bashkëpunimit për të mirën e përbashkët".

Imzot Beneventi thekson se parimi i lirisë mbi të cilin është themeluar Republika e vogël, përkon me atë të mbrojtur nga enciklika Magnifica Humanitas e Leonit XIV, e cila hedh poshtë "çdo logjikë funksionaliste që e redukton njeriun në një performancë të thjeshtë, duke ruajtur dinjitetin e paprekshëm të çdo jete që nga zënia e deri në përfundimin e saj natyror". "Në një dialog të hapur dhe respektues me të gjitha institucionet, shpjegon ipeshkvi, Kisha bashkëpunon si zë profetik i Ungjillit për të mbështetur familjen, për edukimin integral të brezave të rinj dhe për t'i shërbyer të mirës së përbashkët, duke hedhur poshtë logjikën e shpërdorimit, plagën e abortit dhe praktikën e përhapur të amësisë zëvendësuese".

E nëse është e vërtetë që edhe nga një dritare e vogël mund të shihet bota - siç pohoi Monaldo Leopardi, babai i poetit Giacomo - edhe nga realiteti i dioqezës së San Marino-Montefeltro, shfaqja e një "ndryshimi të shpejtë në paradigmën kulturore" nuk mund të kalojë pa u vënë re, duke imponuar "një vizion teknokratik dhe funksionalist" të njerëzimit, kundër të cilit komuniteti lufton çdo ditë.

“Nuk mund të heshtim” - përfundon ipeshkvi - përballë krimeve universale kundër jetës dhe dinjitetit të çdo qenieje njerëzore. Për këtë arsye, ne e përsërisim dhe e bëjmë tonën, së bashku, thirrjen e tij të vazhdueshme dhe të zjarrtë për paqe, për t’i dhënë fund të gjitha luftërave”.