Leoni XIV në fluturim për në Stamboll, ndalesa e fundit në ditën e tij të parë në Turqi

R.SH. / Vatikan

Në orën 6:35 pasdite (ora lokale), avioni Airbus A320neo i ITA Airways me Papën Leono XIV u nis nga Aeroporti Ndërkombëtar Ankara-Esenboğa me destinacion Stambollin, qytetin më të madh në Evropë që ndodhet midis dy kontinenteve: Azisë dhe Evropës. Papa do të qëndrojë në Turqi (Türkiye) deri të dielën, më 30 nëntor, përpara se të udhëtojë për në Liban deri më 2 dhjetor, në udhëtimin e tij të parë apostolik.

Vizitë në Mauzoleun e Ataturkut

Dita e Papës në kryeqytetin turk filloi në orën 10:22 të paradites (ora lokale) me ulje dhe një pritje zyrtare nga Ministri i Kulturës dhe Turizmit i Turqisë, Mehmet Nuri Ersoy, përpara se të vazhdonte me një vizitë në Mauzoleun e Ataturkut.

Papa nënshkruan Librin e Nderit në Mauzoleun e Ataturkut në Ankara   (@Vatican Media)

Takim me Presidentin Erdogan

Pasdite, Leoni XIV u zhvendos në pallatin presidencial, ku u prit nga Presidenti Rexhep Tajip Erdogan.

Papa Leoni XIV me Presidentin turk Rexhep Tajip Erdogan (@VaticanMedia)   (@Vatican Media)

Fjala drejtuar autoriteteve turke

Pas ceremonisë së mirëseardhjes dhe një takimi privat, Papa shkoi në Bibliotekën e Kombit, ku u takua me përfaqësues të autoriteteve, shoqërisë civile dhe trupit diplomatik, përpara se të mbante një fjalim.

Papa në Presidencën për Çështjet Fetare

Pastaj Papa udhëtoi për në Presidencën për Çështjet Fetare (Diyanet), duke u takuar me presidentin e saj, Safi Arpaguş, për një bisedë të shkurtër.

Papa Leoni XIV me presidentin për Çështjet Fetare, Safi Arpaguş (@VaticanMedia)   (@Vatican Media)

Nisja për në Stamboll

Ndalesa e fundit ishte një vizitë në Nunciaturën Apostolike në Ankara. Prej andej, Leoni XIV udhëtoi për në aeroportin e kryeqytetit. Pati një vonesë të vogël në krahasim me kohën e planifikuar të nisjes, sepse Papa, duke u larguar nga Nunciatura, ngadalësoi për të përshëndetur, nga makina e tij, njerëzit e mbledhur përpara një Kishë famullitare.