Imzot Gallagher OSBE-së: duhet të ketë angazhim për parandalimin dhe zgjidhjen e konflikteve

R.SH. - Vatikan

Imzot Paul Richard Gallagher, Sekretari i Vatikanit për Marrëdhëniet me Shtetet dhe Organizatat Ndërkombëtare, flet, në Vjenë, në Këshillin e 32-të Ministror të Organizatës për Siguri dhe Bashkëpunim në Evropë (OSBE), që mbahet sot dhe nesër në kuadrin e 50-vjetorit të Aktit Final të Helsinkit. Duke iu drejtuar Presidentes Elina Valtonen, Ministre e Punëve të Jashtme të Finlandës, Kryeipeshkvi Gallagher i kërkoi organizatës së OSBE-së që "të ripërtërijë urgjentisht dhe në mënyrë krijuese angazhimin e saj themelor për parandalimin dhe zgjidhjen e konflikteve". Në një epokë polarizimi intensiv, ftesa është të rigjallërohet misioni i saj, i bazuar në respektin për personin njerëzor dhe barazinë sovrane të 57 shteteve pjesëmarrëse. Duke praktikuar një qasje gjithëpërfshirëse, ne duhet të rimarrim frymën e Helsinkit: një frymë hapjeje, dialogu, mirëkuptimi të përbashkët, shprese dhe kompromisi.

Promovimi i dialogut dhe paqes

Duke njohur përçarjet e thella, mosbesimin në rritje dhe perceptimet divergjente të sigurisë, si dhe rigjallërimin e konflikteve në kontinentin evropian, Kryeipeshkvi Gallagher shpreh shqetësimet e Selisë së Shenjtë. Lufta në Ukrainë është një burim shqetësimi i veçantë: "Në të njëjtën kohë," shton ai, "nuk mund ta injorojmë faktin se, përveç Ukrainës, shtetet e tjera pjesëmarrëse vazhdojnë të përballen me sfida të shumta për sigurinë dhe stabilitetin e tyre. Në këtë kontekst," apelon ai, "Selia e Shenjtë i nxit të gjitha palët të rifillojnë dialogun e vërtetë, të ndërpresin armiqësitë dhe të ndjekin një paqe të drejtë dhe të qëndrueshme". Këto deklarata u bënë menjëherë pas udhëtimit apostolik të Papës në Turqi dhe Liban, gjatë të cilit Ati i Shenjtë theksoi nevojën urgjente për "njerëz që promovojnë dialogun dhe e vënë atë në praktikë me vullnet të vendosur dhe vendosmëri të durueshme". Një dialog, saktëson më tej Sekretari i Vatikanit për marrëdhëniet me Shtetet, i cili nuk duhet të konsiderohet "një shenjë dobësie, por përkundrazi e vetmja mënyrë për të arritur pajtimin dhe stabilitetin e qëndrueshëm".

Liria e fesë dhe besimit

Imzot Gallagher i kushton vëmendje të veçantë formave në rritje të shpejtë të intolerancës dhe diskriminimit bazuar në fe. Ai i konsideron manifestimet e antisemitizmit, si dhe ato kundër të krishterëve, myslimanëve dhe anëtarëve të feve të tjera, në të gjithë rajonin e OSBE-së "alarmuese". Në këtë drejtim, "Selia e Shenjtë mirëpret udhëzimet e botuara së fundmi për luftimin e krimeve të urrejtjes kundër të krishterëve dhe është e bindur se strukturat ekzekutive të OSBE-së, së bashku me shtetet pjesëmarrëse, do të trajtojnë të gjitha format e intolerancës dhe diskriminimit kundër të krishterëve, hebrenjve, myslimanëve dhe anëtarëve të feve të tjera, duke siguruar vëmendje të barabartë dhe duke shmangur qasjet e njëanshme ose selektive". Duke ripohuar se liria e fesë ose e besimit është e vetmja liri themelore e sanksionuar në mënyrë të qartë në Dekalogun e Helsinkit, imzot Gallagher këmbëngul gjithashtu se "toleranca vetëm nuk është sinonim i lirisë së vërtetë".

Migrimi, trafikimi i qenieve njerëzore dhe mbrojtja e dinjitetit

Lidhur me temën e trajtimit të migrantëve, refugjatëve dhe personave të zhvendosur, imzot Gallagher përdor një gjuhë po aq të qartë. Për më tepër, në përfundim të fjalimit të tij mbajtur në Vjenë, ai theksoi fuqimisht nevojën për një gjuhë "të qartë dhe të saktë" nëse duam të ruajmë marrëdhëniet dhe dialogun autentik. "Fytyra njerëzore e migrimit nuk duhet të anashkalohet kurrë, sepse dinjiteti i patjetërsueshëm, i dhënë nga Zoti çdo personi njerëzor nuk mund të shkelet", theksoi përfaqësuesi i Selisë së Shenjtë, i cili përsëriti rëndësinë e "njohjes se çdo migrant është një person, jo thjesht një statistikë, që meriton mbrojtje, mikpritje dhe mundësi për integrim kuptimplotë". Së fundmi, Vatikani vlerëson përpjekjet e vazhdueshme të OSBE-së në luftën kundër trafikimit, veçanërisht shfrytëzimit të grave dhe fëmijëve, duke përfshirë edhe praktika të tilla si amësia surrogate. Në këtë pikë, apeli ishte i fortë: "Kjo formë e tmerrshme e skllavërisë moderne duhet të zhduket përmes veprimeve të përbashkëta dhe të koordinuara në nivelin kombëtar dhe ndërkombëtar".