Kalendari i kremtimeve të Leonit XIV nga prilli deri në korrik
R.SH. / Vatikan
Shën Augustini është filli lidhës i takimeve që do ta shohin Leonin XIV të angazhuar mes prillit dhe korrikut. I pari në muajin prill është udhëtimi i gjatë apostolik në Afrikë, i treti i papnisë së tij. I planifikuar nga 13 deri më 23 prill, ky shtegtim i Papës Leoni XIV parashikon ndalesa në Algjeri, vendi ku shenjti i Hiponës, Augustini lindi dhe ishte ipeshkëv. Pasuar nga Kameruni, Angola dhe Guinea Ekuatoriale.
Po në prill, më datë 26, të dielën e katërt të Pashkëve, Papa do të udhëheqë në orën 09:00 në Bazilikën e Vatikanit Meshën me shugurimet presbiteriale (meshtarake). Një muaj intensiv, siç lexohet në kalendarin e kremtimeve liturgjike të udhëhequra nga Leoni XIV dhe të bëra të ditura sot, 30 mars, nga Zyra e Kremtimeve Liturgjike Papnore.
Tre janë takimet e parashikuara në maj. Të shtunën, 2 maj, në Bazilikën e Shën Gjonit në Lateran, Papa Leoni XIV në orën 17:00 do të kremtojë Meshën me Shugurimet episkopale (ipeshkvore). Gjashtë ditë më vonë – të premten, 8 maj – do të shkojë në Kampania, duke vizituar qytetin e Pompeit dhe Napolit. Në Shenjtëroren e së Lume Mari Virgjër të Rruzares së Shenjtë, në Pompei, e themeluar në fund të viteve 1800 nga shën Bartolo Longo, është parashikuar kremtimi i Meshës në orën 10:30. Kremtim në Vatikan për të dielën e 24 majit, solemniteti i Rrëshajave, në orën 10:00.
Nën shenjën e Augustinit
Në muajin qershor, sërish një homazh për shën Augustinin nga Papa, i cili pasi të ketë përfunduar udhëtimin e tij të katërt apostolik në Spanjë nga 6 deri më 12 qershor, do të jetë në Pavia, Itali, të shtunën, më 20 qershor. Në qytetin e njëqind kullave ruhen reliktet e shenjtit, të sjella në vitin 723 me nismën e mbretit lombard Liutprandi. Mbetjet e tij ndodhen në Arkën e Shën Augustinit brenda Bazilikës së San Pietro in Ciel d'oro. Më 29 qershor, solemniteti i shenjtorëve Pjetër dhe Pal, Leoni do të kremtojë Meshën me bekimin dhe vendosjen e simbolit të Palium për Arqipeshkvijtë e rinj Metropolitë.
Vizita në Lampedusa
Në korrik, një tjetër vizitë baritore është në program të shtunën, më 4 korrik. Papa do të shkojë në Lampedusa, Itali, tokë e mbërritjes së udhëtimeve të shpresës së emigrantëve që nisen nga Afrika për të mbërritur në Evropë. Deti i saj mirëpret edhe trupat e shumë njerëzve që kanë humbur jetën në udhëtimin e rrezikshëm, të ndërmarrë shpesh me mjete lundrimi të improvizuara. Mesha do të kremtohet në orën 10:00, saktësisht 13 vjet pas mbërritjes së Papa Françeskut në ishullin pelagjik, vizita e parë jashtë Vatikanit për Papën argjentinas, i cili aasokohe denoncoi “globalizimin e indiferencës”. Fjalë të thëna për të “zgjuar ndërgjegjet” përpara dramës së njerëzve që ëndërronin një të ardhme më të mirë.
