Kardinali Pizzaballa Atembelea Taybeh, Aomba Hifadhi ya Kikristo Katika Eneo Hili
Na Valerio Palombaro, - Vatican.
Kardinali Pierbattista Pizzaballa, Patriaki wa Kilatini wa Yerusalemu, alionesha mshikamano wake na watu wa Taybeh wakati wa ziara yake katika kijiji kidogo cha Kikristo katika Ukingo wa Magharibi kwenye Sherehe ya Kupalizwa kwa Bikira Maria. Tutaendelea kufanya kila tuwezalo kuhifadhi uwepo wa Kanisa hapa, katika kila ngazi, katika Nchi Takatifu. Huenda nisiwe na majibu katika ngazi ya kibinadamu au ya kidunia, lakini ninaamini katika Mungu. Na nina uhakika kwamba, kwake, tunaweza kuendelea kuleta uzima, hata hapa Taybeh," Kardinali Pizzaballa alisema hayo wakati wa Misa katika Kanisa la Kilatini la Kristo Mwokozi huko Taybeh. Kukaribishwa “miongoni mwa watu wake”: Akimkaribisha Patriaki mwanzoni mwa Ibada ya Misa Takatifu, Padre Bashar Fawadleh wa Parokia ya Taybeh, alisema kwamba kijiji hicho kilimkaribisha “miongoni mwa watu wake na nyumbani kwake.” Kulingana na taarifa kutoka Upatriaki wa Kilatini wa Yerusalemu, Padre huyo alielezea uwepo wa Kardinali kama ule wa Baba aliyesimama kando ya watoto wake katika nyakati ngumu.
Padre Bashar pia alisema kwamba uwepo wa Kardinali Pizzaballa uliikumbusha jamii kwamba wako pamoja na kwamba Kanisa linasimama na watoto wake, likiwa limebeba “Msalaba na matumaini ya nchi hii.” Kardinali Pizzaballa alielezea Sherehe ya Kupalizwa Mbinguni kama “tunda la Ufufuko” na kusema kwamba Maria anawafundisha Wakristo kutazama uhalisia “kwa macho ya kimungu,” badala ya mtazamo wa kibinadamu. Kisha aliunganisha ujumbe huu moja kwa moja na Taybeh, akiwahimiza watu wake kisimama imara katika imani na matumaini hata wakati hali zinapofanya wakati ujao kuwa mgumu au uonekane kuwa hauwezekani.
Kulinda moyo dhidi ya hofu: Kardinali pia alisisitiza kwamba kuhifadhi uwepo wa Kikristo kunahitaji kulinda moyo dhidi ya hofu, kukata tamaa na athari za hali ngumu. "Lakini tunataka kubaki kama jumuiya iliyo na uhai, bila kuacha haki zetu, haki yetu ya kuishi," alisema. "Kwa hivyo muwe na ujasiri. Msiogope." Kardinali Pizzaballa pia alisema kwamba anafuatilia maendeleo huko Taybeh kwa karibu kupitia masasisho ya mara kwa mara kutoka kwa Padre Bashar. Ziara ya Patriaki ilifanyika katika muktadha wa amri ya Israeli iliyotolewa mwezi Julai iliyopita ikitangaza "eneo la Taybeh na Rimon" kuwa eneo la kijeshi lililofungwa, na kuwazuia Waisraeli na raia wa kigeni kuingia au kubaki huko.
Haja ya uwepo endelevu wa Kikristo: Eneo lililotengwa linajumuisha sehemu ya eneo lililojengwa la Taybeh, ardhi ya kilimo, na maeneo ya kidini na kihistoria. Agizo hilo pia limeibua maswali kuhusu ufikiaji wa Taybeh kwa mahujaji, wageni, waandishi wa habari, watu wa kujitolea na raia wengine wa kigeni. Kardinali Pizzaballa alisema kwamba kinachoendelea Taybeh kinazidi kujulikana zaidi ya mji wenyewe. Kwa kuzingatia hili, Kardinali Pizzaballa alisisitiza, "Mfano wao ni muhimu, ili tuweze kuendelea kuwa sauti ya Kikristo katikati ya hali hii ngumu sana."
