Papa Leo XIV: Uongozi Katika Kanisa Ni Kielelezo Cha Huduma!
Na Padre Richard A. Mjigwa, C.PP.S. – Vatican.
Maadhimisho ya Mkutano Mkuu wa Mashirika ya Kitawa na Kazi za Kitume ni kipindi maalum cha watawa kukutana katika: Sala, tafakari na mang’amuzi ya kina mintarafu amana na utajiri wa mashirika na wanashirika wenyewe. Ni wakati muafaka kwa wanashirika kufanya upembuzi yakinifu kuhusu maisha na utume wa mashirika yao, kwa kuangalia changamoto, matatizo na fursa zilizopo kama sehemu ya mchakato wa uinjilishaji mpya unaofumbatwa katika ushuhuda wenye mvuto na mashiko. Huu ni wakati muafaka wa kusoma alama za nyakati na kuangalia wapi ambapo Roho Mtakatifu anawataka kwenda baada ya mikutano yao mikuu. Lengo kuu ni kuhakikisha kwamba, watawa wanashiriki kikamilifu katika mchakato wa uinjilishaji wa kina unaogusa maisha ya mtu mzima: kiroho na kimwili kwa kujikita katika ujenzi wa udugu wa kibinadamu kama chemchemi ya furaha inayobubujika kutoka kwa Kristo Yesu na Kanisa lake tayari kujenga Kanisa na Kisinodi na Kimisionari.
Baba Mtakatifu Leo XIV anasema Kanisa linawahitaji viongozi wanaoweza kujisadaka bila ya kujibakiza katika maisha yao kwa ajili ya kuongoza, kufundisha na kuwatakatifuza Watu wa Mungu, kwa kutambua kwamba, uongozi ndani ya Kanisa ni huduma ya maisha ya kiroho na kidugu, kwa ajili ya kutekeleza mapenzi ya Kristo kwa ndugu zake, kwa kujikita katika upendo na unyenyekevu; uvumilivu na udumifu, ili Familia ya Mungu iweze kukua, kutembea, kujenga na kumshuhudia Kristo Yesu Mkombozi wa Ulimwengu. Kristo Yesu anapenda kuchukua fursa hii kuwa kama kielelezo cha upyaisho wa jinsi ya Mitume wake wanavyopaswa kuishi. Kristo Yesu anakazia umuhimu wa kuwalinda, kuwatunza na kuwapokea maskini na wadogo katika huduma, kama ilivyo kwa mtoto mdogo ambaye kimsingi hana mambo mengi. Yote haya Mitume walipaswa kuyazingatia na kuyaweka katika matendo kwa kutambua kwamba, mwanadamu ana kiu ya maisha. Uchu wa mali na madaraka wakati mwingine, unawafanya watu kushindwa kuuona ukweli huu, kwamba, wanaishi kwa sababu wamepokelewa, changamoto na mwaliko ni kuwa ni wahudumu na wala si wamiliki.
Kimsingi huu ni muhtasari wa hotuba ya Baba Mtakatifu Leo XIV aliyoitoa kwa wajumbe wa Mkutano Mkuu wa Shirika la Jeshi la Kristo “Legionaries of Christ; Legionari di Cristo” Alhamisi tarehe 19 Februari 2026. Ni mkutano unaowashirikisha Wanashirika 60 kutoka katika nchi 14, wakiwemo watazamaji ni 20. Watambue kwamba, karama ya Shirika ni zawadi ya Roho Mtakatifu kwa Kanisa, changamoto na mwaliko kwa Shirika kupyaisha maisha na utume wao, huku wakiendelea kuwa waaminifu kwa Injili ya Kristo, kwa ajili ya ustawi, maendeleo na mafao ya Kanisa, lakini zaidi kwa ajili ya Familia ya Ufalme wa Kristo “Regnum Christi.” Tofauti zao msingi ni amana, utajiri na nguzo ya umoja wa Shirika. Baba Mtakatifu Francisko anasema, huu ni mkutano wa watu wa Mataifa ambao, ndani ya mpangilio wa ulimwengu mzima, huendeleza tofauti zao na nafsi; ni jumla ya watu ndani ya jamii inayotafuta mafao ya wengi, ambayo kiukweli yana nafasi kwa ajili ya kila mmoja! Evangelii gaudium, 236, jambo la msingi ni kwa Shirika kuwa wazi na waaminifu kwa wito kutoka kwa Mwenyezi Mungu na kwamba, Roho Mtakatifu anawaimarishia wito na utume wao wa pamoja.
Roho Mtakatifu anagawa karama na mapaji yake kama anavyopenda, lakini yote haya ni kwa ajili ya ujenzi wa Kanisa na kwamba, kila mmoja hupewa ufunuo wa Roho Mtakatifu kwa kufaidiana, kumbe zinapaswa kupokelewa kwa moyo wa shukrani na faraja kwani zote hizi ni kwa ajili ya mahitaji ya Mama Kanisa. Rej. Lumen gentium, 12. Wanashirika ni walinzi na wahudumu wa karama hizi za Roho Mtakatifu, changamoto ni kuendelea kumwilisha karama hizi kwa ubunifu zaidi. Baba Mtakatifu Leo XIV anakaza kusema, katika maisha ya kitawa, uongozi ni huduma ya maisha ya kiroho inayosimikwa katika udugu wa kibinadamu na kwamba, inakita mizizi yake katika Sanaa ya kusindikizana, kuheshimiana na kuthaminiana kama ndugu wamoja; kwa kujenga ujirani mwema. Mwendo wa huku kusindikiza ni lazima uwe endelevu na wenye kutia matumaini, ukidhihirisha ukaribu, mtazamo wa huruma ambayo huponya, huweka huru na huendeleza ukuaji wa maisha ya Kikristo. Rej. Kut 3:5. Rej. Evangelii gaudium, 169.
Uongozi katika Mashirika ya Kitawa lazima uwasaidie wanashirika kuwa waaminifu kwa karama yao, usaidie kuhamasisha maisha ya kijumuiya, kwa kumweka Kristo Yesu kuwa ni kiini na utimilifu wa maisha na utume wao wa kitawa; kwa kuheshimu na kuthamini: haki, utu na heshima ya kila mwanashirika. Mtindo wa uongozi, kumbe, unapaswa kujikita katika ujenzi wa utamaduni wa kusikilizana; uwajibikaji wa pamoja; ujenzi wa udugu wa kibinadamu pamoja na kuwa na utambuzi wa kijumuiya. Watawa wawe ni wataalamu wa ujenzi wa umoja na ushirika; wajenzi wa kanuni auni; kwa kutoa nafasi ya kumwilisha tunu msingi za Kiinjili katika uhalisia wa maisha ya wanashirika; kuwepo na mshikamano wa dhati kati ya viongozi na wahudumu wa maisha ya kijumuiya. Viongozi wawe ni mashuhuda wa utamaduni wa kusikiliza kwa makini, tayari kwa kushirikiana na kushikamana, kutafuta na hatimaye, kutekeleza mapenzi ya Mungu kwa kutambua na kuheshimu tofauti zao msingi. Ujenzi wa umoja katika tofauti anasema Baba Mtakatifu Leo XIV, ni mchakato unaosimikwa katika fadhila ya: Unyenyekevu, uhuru wa ndani pamoja na kupokea utambuzi wa pamoja kwa kuheshimu wito wa kila mwanashirika. Mama Kanisa anaendelea kuwahamasisha watawa kujikita katika ujenzi wa Kanisa la Kisinodi na la Kimisionari, kumbe, Mkutano mkuu wa Shirika ni mahali ya kushirikishana mang’amuzi ya ujenzi huu, kwa ajili ya ustawi na maendeleo ya Shirika kwa siku za mbeleni. Baba Mtakatifu amewaalika Wanashirika hawa kukita maisha yao katika: Sala, unyenyekevu, uhuru wa ndani, daima wakitafuta kutekeleza mapenzi ya Mungu katika maisha yao na waamini kwa karama ya Shirika.
