Papa Leo XIV kwa CEI:Ni uso gani wa Mungu tunaoruhusu uangaze mahubiri?
Na Angella Rwezaula – Vatican.
Baba Mtakatifu hotuba ya kwa Baraza la Maaskofu Katoliki nchini Italia(CEI)katika fursa ya Mkutano Mkuu wa 82 wa Baraza hilo ulioanza tangu tarehe 25 Mei 2026 katika Ukumbi wa Sinodi mjini Vatican, alhamisi tarehe 28 Mei 2026. Alimshukuru Rais wa Baraza la Maaskofu(CEI) kwa maneno yake mazuri. Salamu za dhati kwa wote waliochaguliwa kuhudumu katika Baraza la Maaskofu, hasa Makamu Rais, na kwa kila mmoja wao. Papa alisema kuwa kupitia yeye alipenda kuonesha upendo wake kwa Makanisa yote nchini Italia, kwa mapadre, mashemasi, watu waliowekwa wakfu, familia, makatekista, waelimishaji, vijana, wazee, maskini, wagonjwa, wale wote wanaoishi imani yao katika urahisi wa maisha ya kila siku, na wale wote ambao, labda bila kujua, wana kiu ya Mungu mioyoni mwao.
Ziara ya Napoli
Baba Mtakatifu Leo XIV alisema “hili ndilo tunalopewa heshima ya kuliona kwa njia mbalimbali, hata katika wakati kama wetu, uliojaa ugumu.” Papa alitoa mfano kwamba “Nililiona moja kwa moja katika ziara zangu za hivi karibuni huko Pompei, Napoli na Acerra. Ishara nyingi zinatuambia kuhusu uchovu, kugawanyika, na upweke. Katika jumuiya zetu, wakati mwingine tunaweza kuhisi mkazo wa kusambaza imani, ugumu wa kushirikisha vizazi vipya. Lakini Injili inatushtua. Yesu, kwa kutazama umati wa watu, haoni tatizo la kutatuliwa; bali anaona mavuno, anaona shamba la Mungu: "Mavuno ni mengi, lakini watenda kazi ni wachache; basi mwombeni Bwana wa mavuno atume watendakazi katika mavuno yake!"(Lk 10:2).
Mungu ni mpanzi asiyechoka anakwenda ulimwenguni kila siku
Mungu, mpanzi asiyechoka, anatoka kwenda ulimwenguni kila siku na kwa ukarimu hupanda mioyoni hamu ya wasio na mwisho, maisha kamili, wokovu unaotukomboa. Ndiyo, asante Mungu, mavuno ni mengi. Kazi yetu ya kwanza ni hii: kufanya macho ya Bwana yawe yetu wenyewe. Sio kulalamika tu kuhusu udongo mgumu au kuzingatia idadi tu, bali kuweza kuona, kwa macho ya Mfufuka, mavuno ambayo Mungu mwenyewe anatuandalia.
Roho Mtakatifu atupatie mioyo inayowaka shauku ya Kristo
“Roho Mtakatifu atujalie mioyo inayowaka moto kwa bidii ya Kristo,” Papa alisisitiza; “na awatie moyo wafanyakazi wengi watakatifu kufanya kazi pamoja nasi.” Kwa hivyo, kwa mtazamo huu, kipaumbele ni Injili: Mtakatifu Francis wa Assisi anatuambia hivi, miaka mia nane baada ya kufariki kwake Mbinguni; Evangelii Nuntiandi ya Mtakatifu Paulo VI na Evangelii Gaudium ya Papa Francisko inatukumbusha hili. Kwa maana ni kutokana na Injili imani huzaliwa, kama kukutana hai na Kristo, aliyekufa na kufufuka, aliyepo katika Kanisa lake. Kwa kukazia zaidi alisema, “Leo, katika muktadha ambao tumeitwa kutenda, tukikabiliwa na mitazamo mingine kuhusu maisha na changamoto zisizo za kawaida za anthropolojia, kuirudisha Injili katikati ni zawadi inayotoa shauku kwa maisha yetu kama Maaskofu na uharaka unaotusukuma.
Ni uso gani wa Mungu tunaoruhusu uangaze mahubiri,katekesi,liturujia,upendo na maisha ya jamii zetu?
Baba Mtakatifu aliendelea “Kwa hivyo tumeitwa kujiuliza: ni uso gani wa Mungu tunaouruhusu uangaze katika mahubiri, katekesi, liturujia, upendo, na maisha ya jamii zetu? Tunakuzaje kukutana na Kristo, na inamaanisha nini leo, kwetu na kwa Makanisa yetu, kuwaanzisha wengine katika maisha ya Kikristo? Haya ni maswali ambayo, kama wachungaji, tunapaswa kujiuliza kila wakati, bila kuyachukulia kirahisi. Kwa hivyo, umakini wa upyaishwaji wa kuanzishwa kwa Ukristo, ambao hauwezi kuzingatiwa kama maandalizi ya Sakramenti tu. Ni "tumbo" ambalo jumuiya huzalisha imani na kututambulisha kwa maisha ya Pasaka, kwa ushirika na Bwana, kwa udugu wa kikanisa. Ni suala la kugundua Ubatizo kama ukweli ulio hai na wa kuwepo; na "haiwezekani kuelewa kikamilifu Ubatizo isipokuwa ndani ya Uanzishwaji wa Kikristo, yaani, safari ambayo Bwana, kupitia huduma ya Kanisa na kipawa cha Roho, hututambulisha kwa imani ya Pasaka na kutuingiza katika ushirika wa Utatu na wa kikanisa" (Hati ya Mwisho ya Mkutano wa XVI wa Sinodi ya Maaskofu, 24). Huu ni msisitizo muhimu sana kutoka kwa Mkutano wa hivi karibuni wa Sinodi ya Maaskofu, kwa sababu unaweka safari inayoanza na Ubatizo ndani ya Kanisa linaloamini, kusherehekea, kusindikiza, na kuzalisha.
Kanisa linaweza kuunga mkono uvumilivu na kutoa msukumo
Kanisa ambalo, huku likifurahi kwa mshangao mbele ya vijana na watu wazima wa katekumeni, linaweza kuunga mkono uvumilivu wao baada ya msukumo wa awali. Imani hupitishwa na kukua pale ambapo kuna jumuiya zenye nguvu na ukarimu, zenye uwezo wa kuomba na kusikiliza; jumuiya ambazo Neno la Mungu haliachiwi pembezoni, bali huangazia maamuzi, ambapo Ekaristi ni chanzo na kilele cha kweli, ambapo maskini si wapokeaji wa huduma wa nje, bali ni kaka na dada ambao Bwana huzungumza nasi kupitia kwao; ambapo vijana ni nyuso, sauti, na hadithi za kuzungumza nazo; ambapo familia haziachiwi peke yao, na majeraha hayafichiki, bali huletwa kwa unyenyekevu mbele za Bwana; ambapo imani inakuwa kujitolea kwa ufanisi katika jamii, siasa, na utamaduni. Kwa sababu hii hasa, sisi Maaskofu tumeitwa kusikiliza kwa undani: kusikiliza Neno la Mungu, kusikiliza Watu wa Mungu, na kwa hivyo kusikiliza ishara za nyakati, na pia kile kinachopinga mazoea yetu ya kichungaji. Pale ambapo kusikiliza ni kweli, jumuiya haijifungi yenyewe, bali inakuwa mahali pa utambuzi na utume na, kwa lengo hili, linajua jinsi ya kujirekebisha.
Maana ya kutembea Kisinodi
Baba Mtakatifu alisema kuwa hii ndiyo maana ya Njia ya kisinodi ambayo wamekamilisha na ambayo, kama walivyosisitiza, sasa lazima iwe mtindo wa kudumu. Mtaguso wa Pili wa Vatican ulitukumbusha kwamba Mungu alifurahi kuwatakasa na kuwaokoa wanadamu si peke yao na bila uhusiano wowote kati yao, bali kwa kuwaweka katika watu wanaomtambua katika kweli na kumtumikia katika utakatifu (taz. Katiba ya Dogmatic Lumen Gentium, 9). Kanisa la kisinodi ni lile ambalo kila mtu, kulingana na wito wake mwenyewe, anaweza kutoa zawadi aliyopokea kutoka kwa Roho kwa ajili ya ujenzi wa pamoja. Kwa hivyo, ushiriki si makubaliano: ni sharti la ushirika na utume na, kwa hivyo, lazima iwe njia, uwajibikaji, na uthibitisho, unaohusisha karama na huduma tofauti na kuheshimu jukumu maalum la Askofu. Muhtasari wa Hati ya Njia ya Sinodi ya Makanisa nchini Italia unakumbusha thamani ya miili shirikishi kama mahali ambapo utambuzi wa jumuiya unaweza kuchukua sura. Hata hivyo, haitoshi kwamba zana hizi zipo; tunahitaji kuthibitisha kwamba zinafanya kazi kweli.
Katika mchakato huo Papa aliongeza, miundo mbalimbali ya CEI inaitwa kuendelea kutekeleza huduma yao ya ushirika, uratibu, utambuzi, na usaidizi kwa Makanisa nchini Italia. Kwa sababu hasa ya jukumu hili, mpangilio wa Baraza la Maaskofu lazima uundwe kulingana na mahitaji ya utume na mabadiliko ya hali ya kihistoria. Sio suala la kuiga mifumo ya nje ya shirika, wala kupunguza kila kitu kwa ufanisi wa kiutawala, bali ni kuuliza ni muundo gani unaowasaidia Wachungaji na Makanisa mahalia leo hii kutangaza Injili vyema, kutembea pamoja, kuwezesha ushiriki wenye ufanisi, utaratibu, na matunda. Unapoishi katika Roho, uchunguzi huu haudhoofishi ushirika bali huutakasa.
Bwana hatuombi kupima matunda ya Kanisa kwa muktadha wa namba
Baba Mtakatifu alisema kwamba, Bwana hatuombi tupime matunda ya Kanisa kwa vigezo vya idadi, mwonekano, au ushawishi. "Tunapotazama kwa macho ya Mungu, tunagundua kwamba amechagua njia ya udogo, ishuke kati yetu.[…] Mantiki hii ya udogo ndiyo nguvu ya kweli ya Kanisa. Kiukweli, haliishi katika rasilimali na miundo yake, wala matunda ya utume wake hayatokani na makubaliano ya idadi, nguvu za kiuchumi, au umuhimu wa kijumuiya. Kinyume chake, Kanisa linaishi kwa nuru ya Mwanakondoo na, likiwa limekusanyika karibu Naye, linabebwa katika njia za ulimwengu kwa nguvu ya Roho Mtakatifu" (Hotuba katika Mkutano wa Maombi, Istanbul, Novemba 28, 2025). Tuwe na ujasiri wa kukabiliana na mambo muhimu! Ujasiri wa jamii usiojali kuhifadhi kila kitu na zaidi huru kutangaza,” alihitimisha.
Ikumbukwe Mkutano Mkuu wa Baraza la Maaskofu Italia(CEI) ulianza tarehe 25 Mei katika Ukumbi wa Sinodi mjini Vatican. Mkutano huo ulijikita na masuala ya "Miongozo ya Safari ya Makanisa nchini Italia" na maamuzi kadhaa ya kupokea Njia ya Sinodi: Maaskofu waliitwa kuidhinisha mtazamo wa kichungaji kwa miaka ijayo, wakijenga juu ya mchakato wa sinodi uliowekwa katika Hati ya Muhtasari. Miongozo haichukui nafasi ya maandishi ya Sinodi, lakini inaakisi baadhi ya vipengele ambavyo vinaonekana ni muhimu kuungana, kutokana na ufahamu kwamba imani haiwezi kuchukuliwa kirahisi na kwamba jumuiya hairejei tena Injili mara kwa mara. Wakati wa mkutano huo, ulimchaguwa Askofu Gianmarco Busca, kuwa Makamu Rais wa Kanda ya Kaskazini, pamoja na wajumbe wa Baraza la Masuala ya Uchumi na marais wa Tume kumi na mbili za Maaskofu kwa miaka mitano ijayo.
Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku: Just click here.
