Vatican,anga za Ulimwengu:angaza juu ni faida ya pamoja si uwanja wa kupata faida

Na Sr. Christine Masivo, CPS - Vatican.

Askofu Mkuu Gabriele Caccia,  Mwakilishi wa Kudumu wa Vatican katika Umoja wa Mataifa, huko mjini New York, Marekani akihutubia  katika Majadiliano kuhusu Anga za Nje katika Kamati ya Kwanza ya Kikao cha 80 cha Baraza Kuu la Umoja wa Mataifa(UN), tarehe 27 Oktoba 2025, alibainisha kuwa: “Ukubwa wa anga za juu ni ulimwengu wenye fursa kubwa, lakini pia ni ulimwengu wa uwajibikaji mkubwa. Unaakisi "fumbo la Uumbaji, ukuu wake, na udhaifu wake," na unatukumbusha kuwa usimamizi wake hauwezi kutenganishwa na wajibu wa manufaa ya pamoja ya wanadamu wote.”

Kuenea kwa silaha zinazotegemea anga za juu

Askofu Mkuu alisisitiza hali mbili za uchunguzi wa anga za juu, kama mpaka wa maendeleo ya kisayansi na uwanja unaowezekana wa migogoro. Licha ya miongo kadhaa ya majadiliano, alilalamika kwamba jumuiya ya kimataifa bado haijafikia makubaliano kamili yanayokataza aina zote za silaha katika anga za juu. "Inasikitisha kwamba, licha ya anga za juu kuwa mada ya Mkutano wa Kupunguza Silaha tangu 1985, hakuna makubaliano ya kisheria yaliyofikiwa ya kupiga marufuku silaha katika anga za juu," alibainisha.  "Kuenea kwa silaha zinazotegemea anga za juu, ikiwa ni pamoja na mifumo ya kupambana na setilaiti, na kuongezeka kwa mcahfuko wa anga za juu ni tishio kubwa na la kweli kwa amani ya kimataifa, usalama, na uendelevu wa muda mrefu wa shughuli."

Anga za juu kwa manufaa ya kizazi kijacho

Akithibitisha msimamo wa muda mrefu wa Vatican, Askofu Mkuu Caccia alisisitiza kwamba anga za juu lazima zibaki kuwa eneo la pekee kwa madhumuni ya amani na manufaa ya wanadamu wote. Akinukuu Mkataba wa Anga za Juu, aliwakumbusha wanachama kwamba anga za juu ni "faida ya pamoja" si uwanja wa kutawala au kupata faida, bali uwanja uliokabidhiwa kwa utunzaji wa pamoja wa wanadamu. "Mkataba wa Anga za Juu unahifadhi maono haya," alisema, "ukitukumbusha kwamba anga za juu ni faida ya pamoja inayopaswa kulindwa kwa manufaa ya vizazi vya sasa na vijavyo, badala ya kutumiwa kwa maslahi ya pekee ya vyombo vya kibinafsi au mataifa. Hatupaswi kuruhusu anga za juu kuwa marudio ya migogoro ya zamani, wala ukumbi mpya wa mashindano unaohatarisha wote."

Kukaribia anga za juu kwa roho ya mshikamano na amani

Askofu Mkuu Caccia alihimiza Jumuiya ya kimataifa kukaribia anga za juu kwa roho ya mshikamano na amani na kuhakikisha kwamba uvumbuzi wa binadamu katika ulimwengu huu unachangia kustawi kwa watu wote na kulinda mazingira. "Ni muhimu kwamba uwezekano wa anga za juu utumike ili kuimarisha mshikamano, kulinda mazingira, na kukuza amani," alithibitisha. "Anga za juu lazima zibaki kuwa uwanja wa matumaini, maendeleo, na uwajibikaji wa pamoja kwa vizazi vijavyo." Kama Mwakilishi wa kudumu, Askofu Mkuu huyo alisema “Vatican, inashiriki kikamilifu katika majadiliano ya pande nyingi ili kukuza amani, utu wa binadamu, maendeleo ya maadili, na usimamizi wenye uwajibikaji wa Uumbaji.” Kwa kuhitimisha alisema  Michango yake katika kupokonya silaha na mazungumzo ya anga za juu yanaonyesha mvuto thabiti wa kimaadili wa ushirikiano, kujizuia, na kipaumbele cha manufaa ya pamoja ya kimataifa.”