அன்னை ஓர் அதிசயம்

டேனிகா அமிஷ்

இறைவனின் பேரன்பையும் மனிதர்களின் பாவ நிலையையும் எண்ணிக் கண்ணீர் மல்க மக்களை அழைத்த தாய் அன்னை மரியா. மனந்திரும்புதலுக்கும் இறைவனிடம் திரும்புவதற்கும் வழிகாட்டும் ஒரு தாயாக அவர் காட்சியளித்த இடமே சலேத் (La Salette) மலைப்பகுதியாகும். இந்த வரலாற்று நிகழ்வு 1846 ஆம் ஆண்டு செப்டம்பர் மாதம் 19 ஆம் தேதி பிரான்ஸ் நாட்டின் லா சலேத்-பாலாவாக்ஸ் (La Salette-Fallavaux) என்ற மலைப்பகுதியில் நிகழ்ந்தது. ஆல்ப்ஸ் மலைத்தொடரின் ஒரு பகுதியான அந்த இடத்தில் அன்னை மரியா இரண்டு எளிய சிறுவர்களுக்குத் தம்மைக் வெளிப்படுத்தினார்.

மெலனி கால்வாட் (Mélanie Calvat) மற்றும் மாக்சிமின் ஜிரார்டு (Maximin Giraud) என்ற அந்த இரு சிறுவர்களும் மலைப்பகுதியில் மாடு மேய்த்துக் கொண்டிருந்தபோது, ஒரு பிரகாசமான ஒளியைக் கண்டனர். அந்த ஒளியின் நடுவே ஒரு பெண்மணி அமர்ந்திருப்பதைக் கண்டார்கள். அந்தப் பெண்மணி தனது இரு கைகளையும் முகத்தில் வைத்துக் கொண்டு அழுதுகொண்டிருந்தார். அவர் அணிந்திருந்த வெள்ளை நிற ஆடை விண்ணக ஒளியால் பிரகாசித்துக் கொண்டிருந்தது. அவரது துயரம் தோய்ந்த முகம் சிறுவர்களை வியப்பிலும் அச்சத்திலும் ஆழ்த்தியது. அன்னையின் தலையில் ரோஜா மலர்களால் ஆன ஒரு அழகான கிரீடம் சூட்டப்பட்டிருந்தது. அவரது கழுத்தில் ஒரு பெரிய சிலுவை இருந்தது. அந்தச் சிலுவையில் ஒருபுறம் சுத்தியலும் மறுபுறம் பிடுங்கியும் செதுக்கப்பட்டிருந்தன. இது மனிதர்களின் பாவங்களையும் மனந்திரும்புதலையும் குறிப்பதாக இருந்தது.

சிறுவர்களைக் கண்டதும் அன்னை மரியா எழுந்து நின்றார். "என் பிள்ளைகளே, அஞ்சாதீர்கள்; அருகே வாருங்கள். நான் உங்களுக்கு ஒரு முக்கியமான செய்தியைச் சொல்ல வந்துள்ளேன்" என்று அன்புடன் அவர்களை அழைத்தார். அன்னை மரியா பிரஞ்சு மொழியில் பேசத் தொடங்கினார். மக்கள் கடவுளை மறந்து வாழ்வதையும், ஞாயிற்றுக்கிழமைகளை இறைவனுக்கு அர்ப்பணிக்காமல் வேலைகளில் மூழ்கி இருப்பதையும் எண்ணி அவர் மிகவும் வருந்தினார். முக்கியமாக, இறைவனின் திருப்பெயரை வீணாக உச்சரிப்பதையும், பழிச்சொற்களைப் பேசுவதையும் தவிர்க்க வேண்டும் என்று அன்னை கேட்டுக்கொண்டார். மக்களின் இத்தகைய பாவ செயல்களே இறைவனின் கோபத்தைத் தூண்டுவதாக அவர் எச்சரித்தார்.

மக்களின் இதயங்கள் கடினமாகிப் போனதை எண்ணி அன்னை சிந்திய கண்ணீர், அந்த மலைப்பாறைகளின் மேல் விழுந்தது. மக்கள் மனந்திரும்பாவிட்டால் ஒரு பெரிய பஞ்சமும், துன்பமும் ஏற்படும் என்று அன்னை ஒரு எச்சரிக்கையை விடுத்தார். இந்தத் தண்டனைகள் மக்களை அழிப்பதற்காக அல்ல, மாறாக அவர்களை இறைவனிடம் மீண்டும் கொண்டு சேர்ப்பதற்காகவே என்பதை அன்னை தெளிவுபடுத்தினார். "ஜெபியுங்கள், என் பிள்ளைகளே, காலையிலும் மாலையிலும் தவறாமல் ஜெபியுங்கள்" என்று அவர் வலியுறுத்தினார்.அன்னை மறைந்த பிறகு, அந்த இடத்தில் ஒரு நீரூற்று உருவானது. வறண்டு போயிருந்த அந்தப் பகுதியில் உருவான அந்த நீரூற்று, இன்று வரை வற்றாமல் ஓடிக்கொண்டிருக்கிறது. இது அன்னையின் அருளின் அடையாளமாகப் பார்க்கப்படுகிறது.

இந்தக் காட்சி குறித்த செய்தி காட்டுத்தீ போலப் பரவியது. திருச்சபை அதிகாரிகள் இது குறித்து விரிவான ஆய்வுகளை மேற்கொண்டனர். ஐந்து ஆண்டுகளுக்குப் பிறகு, 1851 ஆம் ஆண்டு, பிரான்ஸ் நாட்டு ஆயர் இந்தக் காட்சி உண்மையானது என்று அங்கீகரித்தார். அன்னை தோன்றிய அதே மலைப்பகுதியில், அன்னையின் நினைவாகப் பெரிய ஆலயம் கட்டப்பட்டது. இன்று இது 'சலேத் அன்னை திருத்தலம்' (Sanctuary of Our Lady of La Salette) என்று அழைக்கப்பட்டு, உலகளாவிய யாத்திரை மையமாகத் திகழ்கிறது. சலேத் மாதாவின் பக்தி முறையில் 'மனந்திரும்புதல்' என்பது மிக முக்கியமானது. பக்தர்கள் நோன்பு இருந்தும், தங்களைத் தாழ்த்திப் பாவமன்னிப்புப் பெற்றும் அன்னையின் பரிந்துரையை நாடுகின்றனர்.

குடும்பங்களில் நிலவும் சண்டைகள் நீங்கி சமாதானம் ஏற்படவும், தீராத வியாதிகளில் இருந்து விடுதலை பெறவும் மக்கள் அன்னையை நோக்கி நவநாள் ஜெபங்களைச் செய்கின்றனர். அன்னை வழியாகப் பல அற்புதங்கள் நிகழ்ந்ததாகச் சாட்சிகள் கூறுகின்றனர். இன்றைய நவீன உலகில் மனிதர்கள் ஜெப வாழ்வை மறந்து, உலக இன்பங்களில் மூழ்கிக் கிடக்கின்றனர். இறைபயமும், குடும்ப மதிப்புகளும் குறைந்து வரும் வேளையில் சலேத் மாதாவின் செய்தி மிகவும் அவசியமானதாக இருக்கிறது. "இறைவனிடமே திரும்புங்கள்" என்ற அன்னையின் அழைப்பு, இன்று கவலையிலும் பாவச் சுமைகளிலும் தவிக்கும் ஒவ்வொரு மனிதனுக்கும் ஒரு புதிய நம்பிக்கையைத் தருகிறது. அவர் நம்மைத் தண்டிக்க விரும்பவில்லை, மாறாக நம்மை மீட்கவே விரும்புகிறார்.

சலேத் மாதா வெறும் காட்சியாளர் மட்டுமல்ல, அவர் ஒரு தீர்க்கதரிசியைப் போல மக்களை எச்சரித்து நல்வழிப்படுத்தினார். அவர் சிந்திய கண்ணீர் ஒவ்வொன்றும் நம் ஆன்மாவின் மீட்புக்காகச் சிந்தப்பட்ட முத்துக்களாகும். மலைகளின் அன்னை என்று அழைக்கப்படும் இவர், இன்றும் மலை உச்சியைப் போல உயர்ந்து நின்று நம்மை வழிநடத்துகிறார். சோதனைகள் வரும்போது நாம் துவண்டு போகாமல் இருக்க, அன்னையின் கரங்களைப் பற்றிக்கொள்வது அவசியமாகும். இறுதியாக, சலேத் மாதாவின் வரலாறு நமக்குச் சொல்லும் பாடம் இதுவே: உண்மையான மனந்திரும்புதல் மட்டுமே வாழ்வை மாற்றும். அன்னை மரியாவின் பரிந்துரையால் நாம் அனைவரும் இறைவனின் அருளைப் பெற்று, நல்வாழ்வு வாழ்வோமாக.