'நம்பிக்கையின் ஒன்றிப்பில்' திருத்தந்தையின் புதிய திருத்தூது மடல்!

செல்வராஜ் சூசைமாணிக்கம் - வத்திக்கான்

நவம்பர் 23, இஞ்ஞாயிறன்று சிறப்பிக்கப்பட்ட கிறிஸ்து அரசரின் பெருவிழாவில், துருக்கி மற்றும் இஸ்னிக் (பண்டைய நீசேயா) பயணத்திற்கு முன்னதாக, முதல் நீசேயா திருச்சங்கத்தின் 1700-வது ஆண்டு நிறைவைக் குறிக்கும் வகையில், 'நம்பிக்கையின் ஒன்றிப்பில்' எனப் பொருள்படும் திருத்தூது மடல் ஒன்றை வெளியிட்டுள்ளார் திருத்தந்தை பதினான்காம் லியோ.

நீசேயா நம்பிக்கை அறிக்கையின் தொடர்ச்சியான பொருத்தத்தையும், அது அனைத்து கிறிஸ்தவர்களுக்கும் வழங்கும் ஒன்றிப்பையும் குறித்து தனது சிந்தனைகளாக கீழ்கண்டவாறு பகிர்ந்துள்ளார்.

01. நம்பிக்கை அறிக்கையைப் புதுப்பித்தல்

நீசேயா நம்பிக்கை அறிக்கைக்கான அதன் உறுதிப்பாட்டை ஆழப்படுத்த திருஅவையை ஊக்குவித்துள்ள திருத்தந்தை, அது கிறிஸ்தவ நம்பிக்கையின் மையத்தை பிரதிநிதித்துவப்படுத்துகிறது என்பதையும் வலியுறுத்தியுள்ளார்.

1700 ஆண்டுகளுக்கு முன்பு உருவாக்கப்பட்ட இந்த நம்பிக்கை அறிக்கை, இயேசு கிறிஸ்துவை இறைத்தந்தையின் ஒரே திருமகனாக நம்புவதில் கிறிஸ்தவர்களை ஒன்றிணைக்கிறது என்றும் குறிப்பிட்டுள்ளார்.

02. நீசேயாவின் இறையியல் முக்கியத்துவம்:

இயேசு முழுமையாக இறையல்பைக் கொண்டவர் அல்ல என்று வாதிட்ட தொடக்க கால கிறிஸ்தவ திரிபுக் கொள்கையாளர்களான ஆரியஸ் (Arius) எழுப்பிய முக்கியமான கேள்விக்கு நீசேயா திருச்சங்கம் பதிலளித்தது என்றும் எடுத்துக்காட்டியுள்ளார்.

இயேசுவை தந்தையோடு ஒரே பொருளானவர் என்று நீசேயா திருச்சங்கம் உறுதிப்படுத்தியது இது என்றும்,  எதிர்கால சந்ததியினருக்கு மரபுவழியை வரையறுக்கும் ஒரு தீவிரமான இறையியல் அறிக்கையாக இது அமைந்துள்ளது என்றும் உரைத்துள்ளார்.

03. வேற்றுமையில் ஒற்றுமை:

நீசேயாவில் பெறப்பட்ட ஒன்றிப்பு இறையியல் மட்டுமல்ல, கிறிஸ்தவ ரீதியானதும் கூட என்பதை இம்மடலில் சுட்டிக்காட்டியுள்ள திருத்தந்தை, இறையியல் மற்றும் கலாச்சாரப் பிரிவுகளைக் கடந்து, நீசேயாவின் நம்பிக்கை அறிக்கை திருஅவை முழுவதும் ஒன்றிணைக்கும் வலிமையாக மாறியது என்றும் மொழிந்துள்ளார்.

மேலும் சீர்திருத்தத் திருஅவையினருக்கு இடையே உள்ள பிளவுகளைத் தீர்ப்பதில் இன்றைய கிறிஸ்தவ ஒன்றிப்புக்கான உரையாடலின் பங்கையும் எடுத்துக்காட்டியுள்ளார்.

04. மனுவுருவெடுத்தல் மற்றும் மீட்பியல்

இயேசு கிறிஸ்து "விண்ணகத்திலிருந்து இறங்கி வந்தார்" மற்றும் மனிதகுலத்தின் மீட்புக்காக "மனிதரானார்" என்ற நம்பிக்கை அறிவிப்பின் ஆழமான தாக்கங்களையும் பிரதிபலித்துள்ளார் திருத்தந்தை.

இயேசுவின் இறை இயல்பும் மனித இயல்பும் மீட்பைப் பற்றிய கிறிஸ்தவ புரிதலுடன் ஒருங்கிணைந்தவை என்பதை அடிக்கோடிட்டுக் காட்டியுள்ள திருத்தந்தை, கிறிஸ்துவின் மனுவுருவெடுத்தல் மற்றும் உயிர்த்தெழுதல் மூலம், மனிதகுலம் தெய்வீக வாழ்வில் பங்கேற்க அழைக்கப்படுகிறது என்றும் தெரிவித்துள்ளார்.

05. நீசேயா நம்பிக்கை அறிக்கையின் தொடர்ச்சி

நீசேயா நம்பிக்கை அறிக்கை ஒரு நிலையான ஆவணம் அல்ல, ஆனால் கான்ஸ்டான்டினோபிள் மற்றும் சால்செடன் திருச்சங்கங்களின் முதல் சீர்திருத்தம் மற்றும் அதற்கு அப்பால் வரலாறு முழுவதும் கிறிஸ்தவர்களின் நம்பிக்கையைத் தொடர்ந்து வடிவமைத்து வருகிறது என்றும், இன்றும், அது கிறிஸ்தவ ஒன்றிப்புக்கான அடித்தளமாக உள்ளது என்றும் குறிப்பிட்டுள்ளார்.

06. கிறிஸ்தவ ஒன்றிப்பின் முக்கியத்துவம்

கிறிஸ்தவ ஒன்றிப்பின் தொடர்ச்சியான முக்கியத்துவத்தை வலியுறுத்தியுள்ள திருத்தந்தை, நீசேயாவில் தொடங்கி பின்னர் வந்த திருச்சங்கங்களால், குறிப்பாக இரண்டாம் வத்திக்கான் திருச்சங்கம் மற்றும் புனித இரண்டாம் ஜான் பால் அவர்கள் எழுதிய "எல்லாரும் ஒன்றாய் இருப்பார்களாக!" (Ut Unum Sint) என்ற திருத்தூது மடலால் தொடரப்பட்ட கிறிஸ்தவப் பணிகளை குறிப்பிட்டுள்ளார்.

மேலும் பிரிவினைகள் பிளவுகள் இருந்தபோதிலும், கிறிஸ்தவ உரையாடல் குறிப்பிடத்தக்க முன்னேற்றத்தை அடைந்துள்ளது என்று உரைத்துள்ள திருத்தந்தை, முழுமையான கிறிஸ்தவ ஒன்றிப்பை நோக்கிய பாதையில் பொறுமை மற்றும் ஒருவருக்கொருவர்மீதான புரிதலுக்கும் அழைப்பு விடுத்துள்ளார்.

07. செயலுள்ள நம்பிக்கைக்கு ஓர் அழைப்பு:

நீசேயாவின் நம்பிக்கை அறிக்கையை ஆழமாகச் சிந்தித்து, அதை தங்கள் அன்றாட வாழ்வில் உண்மையாகக் கடைபிடித்து வாழுமாறு அனைத்துக் கிறிஸ்தவர்களுக்கும் விண்ணப்பித்துள்ளார் திருத்தந்தை.

நீசேயாவின் நம்பிக்கை அறிக்கை வெறும் அறிவுசார் சம்மதத்தை மட்டுமல்ல, குறிப்பாக கடவுள் மற்றும் நமக்கு அடுத்திருப்போர் மீதான அன்பின் மூலம் நம்பிக்கைக்கு உயிருள்ள அர்ப்பணிப்பையும் உள்ளடக்கியது.

மேலும் கடவுள் மீதான அன்பு மற்றவர்களிடம், குறிப்பாக ஏழைகள் மற்றும் ஓரங்கட்டப்பட்டவர்களிடம் நாம் மேற்கொள்ளும் உறுதியான செயல்களின் வழியாக வெளிப்பட வேண்டும் என்று அவர் கேட்டுக்கொண்டுள்ளார்.

08. ஆன்மிக கிறிஸ்தவ ஒன்றிப்புக்கான அழைப்பு:

திருஅவையை அதன் கிறிஸ்தவ ஒன்றிப்புப் பயணத்தில் வழிநடத்தவும், விசுவாசிகளின் நம்பிக்கையைப் புதுப்பிக்கவும், நீசேயாவின் நம்பிக்கை அறிக்கையின் பொதுக்குருத்துவத்தில் அவர்களை ஒன்றிணைக்கவும் தூய ஆவியாரிடம் செபிக்கும் இறைவேண்டலுடன் தனது உரையை நிறைவு செய்துள்ளார் திருத்தந்தை.