Liturgiya oxunuşları: 10 AVQUST. Adi Dövrün XIX RƏBB GÜNÜ
BİRİNCİ OXUNUŞ Müd 18,6-9
O gecə barədə qabaqcadan atalarımıza xəbər vermişdin, beləcə inandıqları vədlərə möhkəm güvənərək cəsarətli oldular. Sənin xalqın həm salehlərin xilasını, həm də düşmənlərin həlakını gözləyirdi. Çünki bir yandan düşmənləri cəzalandırdın, digər yandan da bizi Özünə tərəf çağırıb ucaltdın. Hörmətli insanların müqəddəs övladları gizlicə qurbanlar gətirdilər, ilahi bir qanunla yekdilliklə qərara aldılar ki, müqəddəslər eyni uğurları və təhlükələri birgə paylaşsınlar. Bu zaman atalarının mədhlərini oxumağa başladılar.
Təfsir
Allah Öz işini görür, insanlar da onlara aid olan işi görməlidirlər. Bir çox hallarda iman sahibi olmaq, tamamilə gözlənilməz şəkildə və ən gözlənilməz anlarda özünü göstərən Allahın mərhəmətli qüdrətinə inanaraq cəsarətli bir hərəkət etmək deməkdir. Kim dedi ki, iman sahibi olmaq, əzab qarşısında məstedici, sakitləşdirici və təsəlliverici cavablar axtarmaq deməkdir? Allaha güvənmək - cəsarət əlamətidir, vəziyyətlərin ziddiyyəti qarşısında cəsarətli olmaq qabiliyyətinin göstəricisidir. Allahın həqiqi dostları məhz belə davranır.
İKİNCİ OXUNUŞ İbr 11,1-2.8-19
İman ümid edilənlərə etibar etmək, görünməyən şeylərə əmin olmaqdır. Əcdadlarımız imanları üçün müsbət şəhadət aldılar. İbrahim çağırılanda iman vasitəsilə itaətli olub irs alacağı torpağa getdi. O hara getdiyini bilməyərək yola çıxdı. İman vasitəsilə vəd edilmiş ölkədə bir qərib kimi məskunlaşdı. O eyni vədin həmvarisləri olan İshaq və Yaqubla birlikdə çadırlarda yaşadı. Çünki İbrahim memarı və banisi Allah olan bünövrəli şəhəri gözləyirdi. Sara özü sonsuz və yaşı ötmüş olduğu halda iman vasitəsilə nəsil yaratmaq üçün güc aldı, çünki vəd Edəni sadiq saydı. Buna görə də bir kişidən, artıq ölüdən fərqlənməyən birindən sayca göydəki ulduzlar qədər, dəniz kənarındakı qum kimi saysız-hesabsız nəsil törədi. Bunların hamısı imanlı olaraq öldü. Vəd edilən şeylərə nail olmadılar, amma bunları uzaqdan görüb salamladılar və özlərinin yer üzündə yad və qərib olduqlarını iqrar etdilər. Axı belə sözləri deyənlər bir vətən axtardıqlarını göstərirlər. Əgər onlar çıxdıqları ölkə barəsində düşünsəydilər, qayıtmağa imkanları olardı. Amma əslində onlar daha yaxşı bir ölkəni, yəni səmavi vətəni arzu edirdilər. Buna görə Allah Özünü onların Allahı adlandırmaqdan utanmır, çünki O onlar üçün şəhər hazırlamışdır. İbrahim sınağa çəkildiyi vaxt iman vasitəsilə İshaqı qurban olaraq təqdim etdi. Vədlərə nail olmuş İbrahim bircə oğlunu qurban vermək niyyətində idi. Halbuki ona «İshaqdan törəyənlər sənin nəslin adlanacaq» deyilmişdi. O, Allahı onu ölülər arasından diriltməyə qadir saydı. Buna görə də məcazi mənada İshaqı ölümdən geri aldı.
Təfsir
İbranilərə məktubun 11-ci fəslindən olan bu oxunuşa əsasən, İbrahim və ailəsinin hekayəsi Allaha həqiqətən etibar etməyin nə demək olduğunu göstərir. Həyatımızda tez-tez nə qədər məhdudiyyətlərlə və ya müəyyən maneələri aşmağın qeyri-mümkün olduğunu göstərən vəziyyətlərlə qarşılaşırıq! Lakin Allah qeyri-mümkün görünənləri edə bilər. İbrahim bu həqiqəti dərhal dərk etdi və bu, onun addımlarını və hərəkətlərini işıqlandıran nura çevrildi. Buna görə də o, gələcək əsrlərdə bir çox xalqların atası oldu. O başa düşdü ki, əgər Allahın bizim üçün qurtuluş niyyəti varsa, heç nə və heç kim Ona mane ola bilməz. Buna inanmaq artıq Allahın baxışına daxil olmaq və başqaları üçün görünməz olanı görmək deməkdir. Beləliklə, biz Allaha inandığımız və Onun sözünə etibar etdiyimiz dərəcədə böyüyük.
İNCİL Luka 12,32-48
Qorxma, ey kiçik sürü! Çünki Atanız Padşahlığı sizə verməyi münasib gördü. Əmlakınızı satın və sədəqə verin. Özünüzə köhnəlməyən kisələr, göylərdə tükənməyən xəzinə hazırlayın. Oraya «Qoy qurşaqlarınız bellərinizdə bağlı və çıraqlarınız yana-yana qalsın. Toy ziyafətindən qayıdan ağasını gözləyən adamlara oxşayın. Onlar ağaları gəlib qapını döyən kimi qapını açmağa hazır olurlar. Nə bəxtiyardır o qullar ki, ağa qayıdanda onları oyaq görür! Sizə doğrusunu deyirəm: o özü qurşaqlanıb qullarını süfrəyə oturdacaq və gəlib onlara xidmət edəcək. Ağa istər gecəyarı, istər ondan gec, səhərə yaxın gəlib qulları oyaq görsə, o qullar necə də bəxtiyardır! Amma bunu bilin ki, əgər evin yiyəsi oğrunun hansı saatda gələcəyini bilsəydi, evinin yarılmasına imkan verməzdi. Beləcə siz də hazır olun, çünki Bəşər Oğlu gözləmədiyiniz vaxt gələcək». Peter dedi: «Ya Rəbb, bu məsəli ancaq bizə danışırsan, yoxsa hamıya?» Rəbb cavab verdi: «Vaxtlı-vaxtında onlara yemək vermək üçün ağasının öz nökərləri üzərinə qoyduğu sadiq və ağıllı idarəçi kimdir? Nə bəxtiyardır o qul ki, ağası evinə qayıdanda onu iş başında görür! Sizə həqiqəti deyirəm: ağası bu qula bütün əmlakı üzərində idarəçiliyi tapşıracaq. Amma həmin qul ürəyində “ağam gec gələcək” deyərsə, başqa nökər və qarabaşları döyməyə, yeyib-içməyə, sərxoşluğa uymağa başlayarsa, o qulun ağası onun gözləmədiyi gün və ağlına gəlmədiyi vaxt gələcək, ona ağır cəza verəcək və onu sədaqətsizlərlə bir yerdə saxlayacaq. Ağasının istəyini bilib hazır olmayan və onun istəyinə əməl etməyən qul çox döyüləcək. Bilməyib o cəzaya layiq iş görənsə az döyüləcək. Kimə çox verilibsə, ondan çox da istəniləcək. Kimə çox tapşırılıbsa, ondan daha çox tələb olunacaq.
Təfsir
Müjdələmə işində dünya miqyasında populyarlıq, saysız-hesabsız insan kütləsi gözləmək əbəsdir. İsanın şagirdləri tarixdə kiçik bir sürü olacaqlar. Ancaq "az" - "hazırlıqsız" demək deyil. Bu o deməkdir ki, Məsih məhz bu kiçik sürü vasitəsilə, bu azsaylı imanlılara aid olanların əməkdaşlığı və nümunəsi ilə dünyanı Öz sözü və məhəbbəti ilə alovlandıra bilər. Səmavi Padşahlığın mükafatı bizim başa düşə bilmədiyimiz meyarlara görə Öz lütfünü bəxş edən Allahın mübahisəsiz iradəsinin təsviridir. Buna görə də, əgər xristian sözü başqalarının laqeydliyi və ya nifrətində itibsə, ümidsiz olmayın: Allah Öz Kəlamının bir çox insanın qəlbinə necə toxunacağını və onların həyatına necə işıq gətirəcəyini çox yaxşı bilir. Əsas odur ki, biz bu qurtuluş sözünü qorxmadan, səylə, ümidlə, dua və inamla daşıyaq.
