Liturgiya oxunuşları: 13 SENTYABR. Adi Dövrün XXIII həftəsinin şənbəsi
BİRİNCİ OXUNUŞ 1 Tim 1,15-17
Məsih İsa günahkarları xilas etmək üçün dünyaya gəldi, bu söz etibarlı və tamamilə qəbul olunmağa layiq sözdür. O günahkarlardan ən betəri mənəm. Lakin ən betəri olduğum halda mənə buna görə mərhəmət edildi ki, Məsih İsa mənim vasitəmlə hədsiz səbrini göstərsin. Ona görə ki gələcəkdə Ona iman edib əbədi həyata malik olanlara mən nümunə olum. Əsrlərin Padşahı, ölməz, görünməz və bir olan Allaha əbədi olaraq hörmət və izzət olsun! Amin.
Təfsir
Bu oxunuşda Müqəddəs Paul hamı üçün nümunəyə çevrilmiş Allahın mərhəmətinin hüdudsuzluğunu vurğulayır. Həvari öz şagirdi Timoteyə Məsihin dünyaya günahkarları xilas etmək üçün gəldiyini söyləyir və özünü “günahkarlardan birincisi” adlandırır. Bu, təkcə özünü alçaltma deyil, həm də Allahın mərhəmətinin bir zamanlar Onun ən şiddətli təqibçiləri olanlara da şamil edildiyini dərindən dərk etməkdir. Paul izah edir ki, o, Allahın səxavətinin canlı nümunəsinə çevrilib: “mənə buna görə mərhəmət edildi ki, Məsih İsa mənim vasitəmlə hədsiz səbrini göstərsin”. Onun hekayəsi göstərir ki, heç kim Allahın məhəbbətindən kənarda deyil. Gəlin ürəyimizə inamla qulaq asaq: o, bizə xatırladır ki, Allah bizi olduğumuz kimi sevir və bizi olduğumuz yerdə qəbul edir. Allahın mərhəməti və qurtuluşu keçmiş səhvlərdən asılı olmayaraq hər kəs üçün var. Millətlərin həvarisinin hekayəsi özünü layiqsiz hesab edən hər kəs üçün təsəlli və ümiddir.
İNCİL Luka 6,43-49
Yaxşı ağac pis bəhrə gətirməz, pis ağac da yaxşı bəhrə gətirməz. Çünki hər ağac öz bəhrəsindən tanınır. Qaratikandan əncir yığmazlar, tikan kolundan da üzüm dərməzlər. Yaxşı adam ürəyinin yaxşılıq xəzinəsindən yaxşı şeylər çıxarır, pis adamsa pislik xəzinəsindən pis şeylər çıxarır. Çünki ürək doluluğundan ağız danışar. Nə üçün Məni “ya Rəbb, ya Rəbb” deyə çağırırsınız, amma dediklərimə əməl etmirsiniz? Mənim yanıma gələn, sözlərimi eşidib onlara əməl edən hər adamın kimə bənzədiyini sizə izah edərəm: o, ev tikən elə bir adama bənzəyir ki, torpağı qazıb dərinə gedər və təməli qaya üzərində qurar. Daşqın gəldiyi zaman sellər o evi bassa da, onu sarsıda bilməz. Çünki ev yaxşı tikilib. Amma sözlərimi eşidib onlara əməl etməyən kəs torpaq üzərində təməlsiz ev tikən adama bənzəyir. Sellər o evi basar və ev o anda uçar. O evin yıxılması bir müsibət olar».
Təfsir
Yaxşı əməllər vəruhani həyatın bəhrələri imanımızın üzərində qurulduğu təməli göstərir. Dünənki İncil parçasında Xilaskar dedi ki, kor başqa bir kor insana bələdçi ola bilməz. Bu gün O, bir addım irəli gedərək izah edir ki, “hər ağac öz bəhrəsindən tanınır”. Bu o deməkdir ki, daxili həyatın keyfiyyəti hərəkətlərdə özünü göstərir. İsa izah edir: « Yaxşı adam ürəyinin yaxşılıq xəzinəsindən yaxşı şeylər çıxarır». Bu cür yaxşı bəhrələrin misallarını həvari Paulun məktublarında tapmaq olar: “Müqəddəs Ruhun səmərəsi isə budur: məhəbbət, sevinc, sülh, səbir, xeyirxahlıq, yaxşılıq, sədaqət, həlimlik, nəfsə hakim olmaq” (Qal 5, 22). İsa bu barədə iki ev məsəli vasitəsilə danışır: Onun sözlərini eşidən və yerinə yetirən hər kəs evini qaya üzərində tikib, təməlini dərindən qoyan adama bənzəyir. Həqiqi imanın möhkəm təməli olmalıdır - Allahın Kəlamı, biz onu təkcə dinləmirik, həm də konkret reallıqda təcəssüm etdiririk. Yalnız o zaman bizim “evimiz” (həyatımız) istənilən sınaqlara tab gətirəcək, etibarlı məskənə çevriləcək və yaxşı bəhrə verəcəkdir.
