Liturgiya oxunuşları: 17 SENTYABR. Adi Dövrün XXIV həftəsinin çərşənbəsi
BİRİNCİ OXUNUŞ 1 Tim 3, 14-16
Tezliklə yanına gəlmək ümidi ilə bu şeyləri sənə yazıram ki, əgər geciksəm belə, sən Allahın ev xalqı arasında necə həyat sürmək lazım olduğunu biləsən. Bu xalq var olan Allahın cəmiyyəti, həqiqətin dirəyi və bünövrəsidir. Şübhəsiz ki, möminliyin sirri böyükdür: O,cismən zühur etdi, Ruh tərəfindən təsdiq olundu, mələklərə göründü, millətlərə vəz olundu, dünyada Ona iman edildi, izzətlə göyə çəkildi.
Təfsir
Müqəddəs Paul Timoteyə Kilsənin əsas vəzifəsini xatırladır - İsa Məsih olan həqiqətin dayağı və sütunu olmaq. Bu həqiqət sadəcə bir təlim və ya fəlsəfə deyil, Rəbbin Özüdür. Beləliklə, Kilsənin vəzifəsi Məsih haqqında həqiqəti saxlamaq və qorumaqdır. Sonra həvari İsanın təcəssümündən onun yüksəlişinə qədər olan tarixini bir neçə qısa ifadə ilə ümumiləşdirir: “O, bədəndə təzahür etdi” (Milad); “Ruh tərəfindən təsdiq olundu” (Vəftiz, xidmət); “mələklərə göründü” (təzahürlər); “millətlərə vəz olundu” (həvarilərin missiyası); “dünyada Ona iman edildi” (Kilsənin yaradılması); “izzətlə göyə çəkildi” (Göylərə Yüksəlmə). Bu, imanın əsasıdır, Paulun şagirdinə xatırlatdığı yeganə “ruhani proqramdır”. Bunlar həmin o “prinsip və təməl”dir ki, hər bir imanlılın həyatı onların üzərində qurulmalıdır.
İNCİL Luka 7, 31-35
İsa sözünü davam etdirdi: «Bu nəslin adamlarını nəyə bənzədim? Onlar nəyə bənzəyir? Bazar meydanında oturan və “biz sizə tütək çaldıq, sizsə oynamadınız, biz mərsiyələr oxuduq, sizsə ağlamadınız” deyib bir-birini səsləyən uşaqlara bənzəyirlər. Çünki Vəftizçi Yəhya gəldikdə nə çörək yeyir, nə şərab içirdi və siz deyirsiniz: “O, cinə tutulmuşdur”. Bəşər Oğlu gəldikdə yeyib-içdi və siz deyirsiniz: “Bu qarınqulu və əyyaş adama baxın! Vergiyığanlara və günahkarlara dost oldu!” Amma hikmət öz övladlarının hamısı tərəfindən təsdiq olunur».
Təfsir
Rəbb Öz nəslinin insanlarını oynayan, lakin yoldaşlarını razı sala bilməyən uşaqlarla müqayisə edir. O deyir: “biz sizə tütək çaldıq, sizsə oynamadınız, biz mərsiyələr oxuduq, sizsə ağlamadınız”. Bu o deməkdir ki, Allah hansı mesajı göndərirsə göndərsin, insanlar həmişə etiraz etmək və tənqid etmək üçün bir səbəb tapırlar. Zahid həyat sürən Vəftizçi Yəhya gələndə dedilər: “Onun cinləri var”. İnsanlar arasında yaşayan Bəşər Oğlu gələndə onu “vergiyığanların və günahkarların dostu” adlandırdılar. Problem mesajda deyil, dəyişmək istəməyən insanların özündədir. Məsih bizi laqeydlikdən çıxarır və bizi seçim etməyə çağırır: biz kimin tərəfindəyik? Həyatın bir qırağında oturub hər şeydən, hər kəsdən şikayətlənənlər, yoxsa yuxarıdan gələn hikməti qəbul edənlər tərəfində? Rəbb şagirdləri həyatın kədərli tamaşaçıları deyil, fəal iştirakçıları olmağa çağırır.
