Liturgiya oxunuşları: 27 SENTYABR. Müq. Vikentiy de Pol

“Qardaşlarım, gəlin Allahı sevək, amma Onu öz hesabımıza, əllərimizin zəhməti, alnımızın təri ilə sevək”.

“Yoxsullara xidmət hər şeydən üstün tutulmalıdır. Heç bir gecikmə olmamalıdır. Dua əsnasında dərman çatdırmaq və ya kasıba kömək etmək lazımdırsa, əminliklə gedin. Əgər duanı yoxsullara kömək etmək üçün dayandırırsınızsa, bilin ki, Allaha xidmət elə budur”.  

Müqəddəs Vikentiy de Pol (24.04.1581 - 27.09.1660)

BİRİNCİ OXUNUŞ Zək 2,1-5.10-11a

Mən başımı qaldırıb baxdım və əlində ölçü ipi olan bir adam gördüm. «Hara gedirsən?» deyib soruşdum. O mənə dedi: «Yerusəlimi ölçməyə, en və uzunluğunun nə qədər olduğunu öyrənməyə gedirəm». Mənimlə danışan mələk yanımdan çıxanda başqa bir mələk onu qarşılamağa gəldi və ona dedi: «Qaç, o cavana söylə ki, içində adamlar və heyvanlar çox olduğu üçün Yerusəlim divarsız bir şəhər olacaq. “Mən Özüm onun ətrafında odlu divara çevriləcəyəm, onun içində izzət olacağam” bəyan edir Rəbb». «Şadlıq edib sevin, ey Sion qızı! Çünki aranızda yaşamağa gəlirəm» bəyan edir Rəbb. «O gün çoxlu millətlər Rəbbə bağlanacaq, Mənim xalqım olacaq. O zaman aranızda yaşayacağam. Siz biləcəksiniz ki, Məni yanınıza Ordular Rəbbi göndərib.

Təfsir

Bu oxunuşda Rəbb Zəkəriyyənin peyğəmbərliyi vasitəsilə Yerusəlimin bərpasından sonra onun gələcəyindən danışır. Peyğəmbər Yerusəlimi ölçmək istəyən bir mələk görür. Zəkəriyyə soruşur ki, hara gedirsən? Mələk cavab verir ki, o, “Yerusəlimi ölçməyə, en və uzunluğunun nə qədər olduğunu öyrənməyə” gedir. Amma, əslində, bu ölçü fiziki sərhədlərin deyil, şəhərin gələcək böyüməsinin və genişlənməsinin simvoludur. Mələk deyir ki, Yerusəlim "içində adamlar və heyvanlar çox olduğu üçün divarsız bir şəhər olacaq ", yəni digər şəhərlər kimi divarlarla əhatə olunmayacaq. Bu, paradoksal görünür, çünki divarlar şəhərin əsas müdafiəsi idi. Ancaq burada əsas fikir ondan ibarətdir ki, divarlar lazımsız olacaq, çünki Rəbb Özü şəhərin müdafiəsinə çevriləcək. Rəbb deyir: "Mən Özüm onun ətrafında odlu divara çevriləcəyəm, onun içində izzət olacağam. Şadlıq edib sevin, ey Sion qızı! Çünki aranızda yaşamağa gəlirəm". Bu “od divarı” hər hansı fiziki istehkamdan qat-qat etibarlı olan Allahın hüzurunun və müdafiəsinin simvoludur. Bu oxunuşda qədim Yerusəlimlə bizim aramızda əlaqəni görmək olar. Biz də Müqəddəs Şəhər kimi, Rəbbin bizə gətirdiyi hər kəsi qarşılamaq üçün qəlblərimizi genişləndirməyə (simvolik olaraq “divarlarımızı sökməyə”) çağırılmışıq. Müdafiəmiz və gücümüz “divarlarımızda” (qorxular, qərəzlər, eqoizm) deyil, Öz varlığı ilə bizi qoruyan Allahdadır. Öz sürüsünü qoruyan Yaxşı Çoban kimi, Allah da övladlarını qoruyur. Bizim Onun müdafiəsinə cavabımız açıqlıq və Onun nümunəsinə əməl edərək başqalarını qəbul etməyə hazır olmaqdır.

İNCİL Luka  9, 43b-45

Onlar hamısı İsanın etdiyi işlərə heyrət edərkən O, şagirdlərinə dedi: «Bu sözlərə qulaq asın: Bəşər Oğlu insan əllərinə təslim edilmək üzrədir». Lakin şagirdlər bu sözü başa düşmədilər. Bu sözün mənası onlar üçün gizli qaldı və Ondan bu söz barədə soruşmaqdan da qorxurdular.

Təfsir  

Hər kəs İsanın möcüzələrinə "heyrətlənir", lakin bu heyranlıq həqiqi iman deyil. Tarixi dəyişdirəcək əsl əlamət Onun Ataya tam itaət aktı olan Çarmıxda ölümü olacaq. Buna görə də İsa şagirdlərinə deyir: “Bu sözlərə qulaq asın: Bəşər Oğlu insan əllərinə təslim edilmək üzrədir” Bu, sadəcə bir peyğəmbərlik deyil, xəbərdarlıqdır. Rəbb saysız-hesabsız izdihamın səthi pərəstişkarlığını deyil, Onunla şəxsi münasibət qurmağa hazır olan insanları axtarır. O istəyir ki, Onun davamçıları Onun yaşadığı kimi məhəbbət və xidmətdə yaşasınlar. Şagirdlərin qarşılaşdıqları çətinlik ondan ibarətdir ki, onlar “bu sözü başa düşmədilər. Bu sözün mənası onlar üçün gizli qaldı və Ondan bu söz barədə soruşmaqdan da qorxurdular”. Biz də çox vaxt Rəbbdən nəyisə soruşmaqdan qorxuruq, lakin Onun sözlərini başa düşmədiyimiz üçün deyil.  Əksinə, biz onları çox yaxşı başa düşürük! Biz başa düşürük ki, İsanın ardınca getmək çətin bir addım etməyi tələb edir - sadəcə heyranlıqla deyil, fədakar sevgi və xidmətdə yaşamağı tələb edir. Bu yol zəhmət tələb edir və bu, bizi qorxudur. Bu gün bizim üçün nümunə olan Vikentiy de Pol-dur və onun sözləridir: “Qardaşlarım, gəlin Allahı sevək, amma Onu öz hesabımıza, əllərimizin zəhməti, alnımızın təri ilə sevək”. Bu sözlər göstərir ki, həqiqi iman və Allah sevgisi heyran olmaqdan daha böyükdür. Beləliklə, İncil oxunuşu bizi Məsihin möcüzələrinə səthi heyranlıqla kifayətlənməməyə, xidmət yolunda Onun ardınca getməyə hazır olmağa çağırır.