Papa: Şəhidlər müxtəlif keçmişə sahib xristianları birləşdirə bilər

Kielse Cüsse tərəfindən

14 sentyabr axşamı Müqəddəs Paul Bazilikasında xüsusi tədbir keçirildi. Papa XIV Leo, müxtəlif kilsələrin və icmaların nümayəndələrinin iştirak etdiyi bu mərasimə başçılıq etdi.

Tədbirdə Matta İncilindəki “Bəxtiyarlıqlar” hissəsi şəhidlərin həyatı və onların xristian dəyərlərinə şahidliyi ilə əlaqələndirilərək vurğulandı, müxtəlif Kilsə və icma nümayəndələri dualar oxudular.

Sevgi ölümdən güclüdür

Öz xütbəsində Papa, 14 sentyabrda qeyd olunan Müqəddəs Çarmıxın Ucaldılması bayramını vurğuladı və çarmıxın işgəncə alətindən “xilasımızın vasitəsinə”, “xristianların ümidinə” və “şəhidlərin izzətinə” çevrildiyini açıqladı.

Pravoslav Kilsələrinin, Qədim Şərq Kilsələrinin, Xristian İcmalarının və Ekümenik Təşkilatların üzvlərini salamlayan Papa, Müqəddəs II İoann Pavelin “Ut Unum Sint” ensiklikasına istinad edərək dedi ki, “ölümə qədər şəhidlik” “qanını tökmüş Məsih ilə mümkün olan ən gerçək ünsiyyətdir”.

Papa Leo qeyd etdi ki, bu gün də “nifrət həyatın hər bir tərəfinə sirayət etmiş kimi görünür”. Lakin cəsur kişilər və qadınlar — “İncilin xidmətçiləri və iman şəhidləri” — imanlarına olan sədaqəti ilə sevginin ölümdən güclü olduğunu göstərirlər.

Onlar da xaçı daşıyırlar

İman uğrunda həyatını itirənləri yada salaraq Papa hər kəsi Çarmıxa baxmağa çağırdı. Orada İsa bizə “Allahın gerçək üzünü, bəşəriyyətə sonsuz mərhəmətini” açıqladı. İsa,  dünyanın nifrətini öz üzərinə götürdü ki, “təqib olan və əzilmiş olanların taleyini paylaşsın”.

Müasir dövrdə də çoxlu bacı-qardaşımız “çətin vəziyyətlərdə və düşmən mühitlərdə iman şahidliyi ilə bu xaçı daşımağa davam edirlər: İsa kimi, onlar da təqib olunurlar, mühakimə olunurlar və öldürülürlər.”

Məsihin “Bəxtiyarlıqları” həmin kişilər və qadınlar haqqındadır. Onların İncilə sədaqəti, ədalətə xidməti  və ən ehtiyacı olanlarla həmrəyliyinin qiyməti həyatlarıdır. Papa Leo qeyd etdi ki, “dünyanın ölçülərinə görə, onlar məğlub olublar”. Amma Müdriklik Kitabı fərqli söz deyir: “onların ümidləri ölümsüzlüklə doludur”.

Ümid Yubiley İlində Papa hər kəsi bu iman şahidlərini yad etməyə çağırdı. Onların şəhadətləri vasitəsilə İncilin mesajı yayılmağa davam edir. “Bu, ölümsüzlüklə dolu bir ümiddir, çünki onlar bədəncə öldürülsələr də, heç kim onların səsini susdura və göstərdikləri sevgini silə bilməz.” Onların şahidliyi şərin üzərində qələbənin peyğəmbərliyi olaraq davam edir.

Silahsız bir ümid

Papa Leo vurğuladı ki, bu şəhidlərin şahidliyi “silahsız bir ümiddir”, çünki onlar şiddət və silahların gücünü deyil, İncilin gücünü seçdilər.

O, həyatını Amazonda “torpaqsızlara” həsr etmiş rahibə Doroti Stanq-ın nümunəsinə də toxundu. Onun qatilləri silahını soruşanda, o, onlara Bibliyanı göstərərək, silahının yalnız bu olduğunu söyləmişdi. Papa həmçinin Mosuldan (İraq) olan keşiş Raqeed Qannini də yad etdi — o, həqiqi xristian dəyərlərinə şahidlik etmək üçün döyüşməyi rədd etmişdi.

Başqa bir nümunə Melaneziya Qardaşlığının üzvü olan Anqlikan keşiş Fransisk Tofi idi. O, Solomon adalarında sülh üçün həyatını qurban verdi. Papa Leo vurğuladı ki, “bu gün də xristianların təqibi sona çatmayıb; əksinə, dünyanın bəzi yerlərində daha da artıb”.

Biz unuda bilmərik

“Biz unuda bilmərik və unutmaq istəmirik”, — Papa dedi, — “yadda saxlamaq istəyirik”. O, izah etdi ki, biz digər Kilsələr və xristian məzhəblərdən olan bacı-qardaşlarımızla birlikdə onların şahidliklərini və hekayələrini canlı saxlamaq istəyirik.

Papa, Müqəddəslər üzrə Dikasteriya ilə Xristian Birliyinin Təbliği üzrə Dikasteriyanın birlikdə yerinə yetirdiyi bir vəzifə olaraq Katolik Kilsəsinin bütün xristian ənənələrindən olan bu kişilərin və qadınların xatirəsini qorumaq öhdəliyini təsdiqlədi.

Papa son Sinodun mesajını təkrar etdi: “qan ekümenizmi ‘İsa Məsihə iman uğrunda birlikdə həyatını qurban verən müxtəlif mənşəli xristianları birləşdirir’. Onların şəhidliyi hər bir sözdən daha güclüdür: birlik Rəbbin Çarmıxından yaranır.”  

Tədbirin bağlanışından əvvəl Papa Leo Pakistanlı bir uşağı — Abiş Masihi yada saldı. O, Katolik Kilsəsinə hücum zamanı öldürülmüşdü. Bu uşaq dəftərinə yazmışdı: “Dünyanı daha yaxşı bir yerə çevirmək.” Papa hər kəsi Abişin arzusundan ilham almağa — imana cəsarətlə şahidlik edərək, “sülhsevər və qardaşlıq  bəşəriyyəti üçün maya” olmağa çağırdı.