Papa XIV Leo dua edir ki, Müqəddəs Ruh sülhün hökm sürdüyü bir dünyanın qurulmasına kömək etsin

“Səmavi Mələkə” duası zamanı Papa XIV Leo bütün möminləri Müqəddəs Ruhu çağırmağa səsləyib. Pontifik vurğulayıb ki, Müqəddəs Ruh iman qapılarını açır və Kilsəni “hamı üçün açıq və qonaqpərvər” olmağa ruhlandırır. Papa həmçinin dua edib ki, Müqəddəs Ruh insanlara “müqaviməti, eqoizmi, etimadsızlığı və qərəzi” aşmağa kömək etsin və beləliklə xalqlar və insanlar arasında həqiqi qardaşlıq inkişaf etsin.

“SƏMAVİ MƏLƏKƏ”

Müqəddəs Peter Meydanı
Pentikost bayramı, 24 may 2026-cı il

Əziz bacılar və qardaşlar, Rəbb gününüz mübarək olsun!

Bu Pentikost Təntənəsində biz ilk Kilsənin üzərinə bol-bol tökülən və bu gün də onun üzvlərinə yenidən bəxş olunan Müqəddəs Ruh ənamı üzərində düşünməyə çağırılırıq. Bu Ənam gündəlik həyatımızın bütün hallarında bizə işıq və qüvvə verir.

Gəlin bugünkü liturgiyanın qarşımıza çıxardığı bir təsvir üzərində düşünək: Müqəddəs Ruh qapıları açır. İncil bizə xəbər verir ki, «yəhudi başçılarından qorxduqları üçün şagirdlərin olduqları yerin qapıları bağlı idi» (Yəh 20, 19). Eyni zamanda Həvarilərin İşləri Kitabı deyir ki, Ruh güclü külək kimi gəldi (bax: Həv 2, 2) və həmin qapıları açaraq şagirdləri çölə çıxmağa və dirilmiş Məsihin Müjdəsini bəyan etməyə sövq etdi.

Biz özümüzdən soruşa bilərik: Müqəddəs Ruh bu gün hansı qapıları açır?

İlk növbədə, O, Allahın Özünə aparan qapını açır. Çünki Ruh bizə İsa Məsihdə aşkar olunmuş Allah sirrinə daxil olmaq imkanı verir. Öz Ruhunun ənamı vasitəsilə Allah bizə həqiqi iman bəxş edir, Müqəddəs Yazının mənasını anlamağa kömək edir, Özünü bizə yaxınlaşdırır və bizi Öz həyatında iştirak etməyə çağırır. Müqəddəs Ruh bizə Allahı şəxsən tanımağa, Onu yalnız qanunun yerinə yetirilməsində deyil, İsa Məsihdə tanımağa, Onu öz daxilimizdə kəşf etməyə və gündəlik həyatda Onun hüzurunun əlamətlərini görməyə kömək edir.

İkinci qapı Sion otağının, yəni Kilsənin qapısıdır. Ruhun alovu olmadan Kilsə qorxunun əsirinə çevrilir, dünyanın çağırışları qarşısında çəkingən olur, öz içinə qapanır və dəyişən zamanla dialoq qurmaq qabiliyyətini itirir. Müqəddəs Ruh Kilsənin qapılarını açır ki, o, hər kəs üçün, hətta Allahın, yaxın insanın, ümidin və həyat sevincinin üzünə qapılarını bağlamış insanlar üçün belə, açıq və qonaqpərvər olsun. Papa Fransiskin xatırlatdığı kimi, biz «xeyir-dua verən və ruhlandıran bir Kilsə» olmağa çağırılmışıq… «Kilsənin qapıları hər kəs üçün açıqdır» (Yepiskoplar Sinodunun Baş Assambleyasının açılışındakı vəz, 4 oktyabr 2023).

Nəhayət, Müqəddəs Ruh qəlbimizin qapısını açır. O, bizə müqaviməti, eqoizmi, etimadsızlığı və qərəzləri aşmağa kömək edir, eyni zamanda Allahın övladları və qardaş-bacısı kimi yaşamağa imkan verir. Rəbbin Ruhunun olduğu yerdə insanlar, qruplar və xalqlar arasında qardaşlıq doğulur və hamı fərqlərimizə baxmayaraq bizi birləşdirən və ahəng yaradan dildə - məhəbbətin dilində danışmağa başlayır.

Qardaşlar və bacılar, bu gün, xüsusilə də Pentikost günündə, biz Müqəddəs Ruhu çağırmalı və Ondan hələ də bağlı qalan bütün qapıları açmasını diləməliyik. Biz Allahı bizi sevən Ata kimi yenidən kəşf etməliyik ki, hər kəsin özünü evində hiss etdiyi bir Kilsə quraq və bütün xalqlar arasında sülhün hökm sürdüyü bir dünya yaradaq.

İlk şagirdlər kimi biz də özümüzü Müqəddəs Ruhun Məskəni və Kilsənin Anası olan Məryəm Ananın şəfaətinə etibar edirik.