Papa XIV Leo: Təsəlliverən ağılları nurlandırır və bizi qoruyur

PAPA XIV LEO-NUN MÜQƏDDƏS RUHUN ENMƏSİ (PENTİKOST) BAYRAMI MESSSASINDA VƏZİ

Müqəddəs Peter Bazilikası

24 may 2026-cı il

Əziz qardaşlar və bacılar!

Pasxa dövrü bu gün Pentikost Təntənəsində öz zirvəsinə çatır. Bu xilasedici hadisənin davamlılığını vurğulamaq üçün İncil bizi yenidən «həftənin ilk gününə» (Yəh 20, 19), yəni dirilmiş İsanın şagirdlərə göründüyü, onlara «əllərini və böyrünü» göstərdiyi yeni günə qaytarır. Rəbb Öz izzətli bədənini, xüsusilə də çarmıxa çəkilmənin izləri olan yaralarını aşkar edir. Əzabların bu nişanələri sözlərdən daha təsirlidir: vaxtilə ölmüş Olan indi əbədi yaşayır.

Rəbbi görən şagirdlər də yenidən həyata qayıdırlar. Onlar qorxu içində yuxarı otağa qapanmışdılar, lakin İsa qapılar bağlı olsa belə, onların arasına gəlir və onları sevinclə doldurur. O, bizim “ölümümüzün” içinə daxil olur, çıxış yolu görünməyəndə məzarı açır və onu geniş şəkildə açıq qoyur. Məsih Öz hərəkətlərini bu sözlərlə müşayiət edir: «Sizə salam olsun!» (Yəh 20,19); və dərhal sonra şagirdlərin üzərinə Müqəddəs Ruhu üfürür. Dirilmiş Olan həyatla doludur. O, həqiqi insan kimi həyata qayıtdığını göstərdikdən sonra, Ata tərəfindən sevilən Oğul kimi - bizim üçün qardaşımız və Xilaskarımız olmuş Oğul kimi - ilahi həyatı bəxş edir. Yeni və əbədi Əhdi təsis etdiyi həmin Sion otağında İsa Müqəddəs Ruhu tökür. Sonuncu Şam yeməyinin və xəyanətin məkanı dəyişir; həvarilərin qorxu içində gizləndiyi yer bütün Kilsə üçün Dirilişin bətninə çevrilir. Buna görə Pentikost həm Pasxa bayramıdır, həm də Məsihin Bədəninin bayramıdır; bu Bədən isə lütf vasitəsilə hamımızıq.

Bu sirri qeyd edərkən üç məqama diqqət yetirmək istərdim.

Hər şeydən əvvəl, Dirilmişin Ruhu sülh Ruhudur. Həqiqətən də, Məsih Öz Pasxa Sirri vasitəsilə Allahla bəşəriyyət arasında sülhü bərpa edir və Müqəddəs Ruh bu sülhü qəlblərimizə tökərək onu bütün dünyaya yayır. Bu sülh bağışlanmadan doğur və bizi bağışlamağa aparır. O, İsanın Özünün bizə verdiyi bağışlanmadan başlayır, halbuki biz Ona xəyanət etdik, Onu mühakimə etdik və çarmıxa çəkdik. Dirilmiş Rəbb Öz məhəbbəti ilə bizi heyrətləndirərək deyir: «Kimin günahlarını bağışlasanız, bağışlanacaq» (Yəh 20, 23). Bu sözlərlə İsa bizi ilahi işə şərik edir, çünki günahları yalnız Allah bağışlaya bilər (bax: Mk 2, 7). Bu hakimiyyət ümumbəşəri barışığın əlaməti kimi verilir: Rəbb Öz sülh Ruhunu bütün insanlara bəxş edir, çünki O, hamını ölümün hökmündən xilas edib və heç kəsi Öz məhəbbətindən kənarda qoymur. Həqiqətən də, Müqəddəs Ruh yaradılışın başlanğıcından bəri həyat verən Rəbbdir; O zaman sular üzərində dolaşırdı (bax: Yar 1, 2), indi isə yaradılışı yeniləyərək dünya tarixini dəyişdirir. Pentikost həqiqətən Yeni Əhdin -  Allahla bütün xalqlar arasında bağlanan Əhdin bayramıdır. Yuxarı otaqdakı gurultulu səs, külək və od dilləri Sinaydakı qədim nişanələri xatırlatsa da (bax: Həv 2, 2–3; Çıx 19, 16-19), Allahın müqəddəs qanunu artıq qəlblərimizə yazılıb; Ruh onu məhəbbət hərfləri ilə Məsihin bədəninə və Onun bədəni olan Kilsəyə həkk edir.

Bu qanun sülh qanunudur: Ruh hər ürək döyüntüsündə bizə xatırlatdığı ikiqat məhəbbət əmridir. Buna görə də biz qəlbimizlə «Veni Sancte Spiritus» deyə dua edə bilərik, çünki O artıq bizə verilib. Biz Ona həsrət qala bilərik, çünki O artıq bizə vəd olunub. Biz Onu qəbul edə bilərik, çünki O ruhun şirin qonağıdır.

İkinci məqam budur ki, Dirilmişin Ruhu missiya Ruhudur. Rəbb deyir: «Ata Məni göndərdiyi kimi, Mən də sizi göndərirəm» (Yəh 20, 21). Beləliklə, biz İsanın missiyasına daxil oluruq - Allahdan gələn və Ruhun qüvvəsi ilə yenidən Allaha qayıdan Oğulun missiyasına. Müqəddəs Ruh isə Atadan və Oğuldan çıxır və Onlarla birlikdə tək Allah kimi səcdə və izzət alır. Müqəddəs Ruh Məsihin canlı məhəbbətidir; O bizi doldurur, hərəkətə gətirir və missiyamızda dəstəkləyir (bax: 2 Kor 5, 14). Həvarilərə təbliğ etmək gücünü verən eyni Ruh (bax: Həv 2, 4) bəşəriyyətə xilas Kəlamını da öyrədir. Dirilmişin nəfəsini daxilən qəbul edən həvarilər bu xəbəri Peterin və onunla birlikdə olanların dili ilə elan edirlər. Pentikost gününün özündə həvarilər çarmıxa çəkilmiş və dirilmiş İsanı bəyan etməyə başladılar. Başqa sözlə desək, «Allahın böyük işləri» (Həv 2, 11) xilasda cəmlənir və bu xilas imanla başlayır. Həqiqətən də, Müqəddəs Ruhun bizdə ilk işi budur: «İsa Rəbdir!» (1 Kor 12, 3) deyə etiraf etdiyimiz iman. Bu iman hər yaxşı əməldə, hər mərhəmət və fəzilət işində yaşayır və özünü göstərir. Deməli, Allahın işi bu gün dünyanın hər yerindən buraya gəlmiş hər birimizik; biz Rəbbin süfrəsinə dəvət olunmuş, Onun Kəlamını dinləmək və hər yerdə ona şahidlik etmək üçün toplanmışıq.

Əziz dostlar, biz həqiqətən Müjdənin əməkdaşlarıyıq: bütün Kilsə onun yalnız qoruyucusu deyil, baş qəhrəmanıdır. Ruhun qüdrəti ilə təbliğimiz sevinc və ümidlə dolur, çünki biz — bəli, məhz biz — dünyanın yeniliyiyik, yerin işığı və duzuyuq (bax: Mt 5, 13–14). Əlbəttə, bu bizim şəxsi ləyaqətimiz və ya üstünlüyümüz səbəbilə deyil, günahkarı müqəddəsləşdirən, cüzamlıya şəfa verən və Onu inkar edəni həvariyə çevirən Rəbbin Kəlamı sayəsində mümkün olur. Aydın şəkildə gördüyümüz kimi, elə dəyişikliklər də var ki, onlar dünyaya yeni həyat gətirmir, əksinə, onu yanlışlıq və zorakılıqla qocaldır. Lakin Müqəddəs Ruh ağılları işıqlandırır və qəlblərə yeni həyat gücü verir. Tarixi xilasa açaraq onu dəyişdirən məhz budur; bu xilası isə Rəbb hər kəsə bəxş edir. Kilsənin missiyası da məhz bu təklifi bəyan etməkdir və bununla dünyanın qarışıqlığını Allahla və bir-birimizlə ünsiyyətə çevirir.

Bu missiya Allah və insan haqqında həqiqətin elan edilməsindən başlayır, çünki Dirilmişin Ruhu «Həqiqət Ruhudur» (Yəh 14, 17). Rəbbin bizə vəd etdiyi bu Ruh Kilsənin birliyini -  Allahın məhəbbətinə əsaslanan birliyi istəyir. Peyğəmbərlər vasitəsilə danışmış Ruh həmişə həqiqət içində birliyi təşviq edir, çünki O bizə anlayış, harmoniya və həyat bütövlüyü verir. Müqəddəs Avqustinin öyrətdiyi kimi, «Müqəddəs Ruh Öz hüzurunun əlaməti kimi bunu istədi» (Nitq 269, 1): vahid iman içində başa düşülən dillər ənamını. Paraklit bizi bu anlayışı pozan hər şeydən — tərəfkeşlikdən, riyakarlıqdan və Müjdənin işığını örtən keçici dəblərdən qoruyur. Allahın verdiyi həqiqət bütün xalqlar üçün azadlıq gətirən bir sözə çevrilir; bu söz hər mədəniyyəti daxildən dəyişdirir.

Həqiqətən də, Dirilmişin Ruhu birdəfəlik tökülmür, davamlı şəkildə verilir. Yevxaristiya bizi fasiləsiz qidalandıran Məsihin canlı hüzuru olduğu kimi, Müqəddəs Ruh da Vəftizdə öz möhürünü bizə vurur və bizi xristian edir; Konfirmasiyada (Məshetmədə) bizi şahid kimi möhkəmləndirir; Əlqoyma Sirrində isə Allah xalqı üçün xidmətçilər və çobanlar edir. Hər bir Müqəddəs Sirrdə O, dator munerumdur — müqəddəslik mənbəyi; dua, mərhəmət işləri və Allahın Kəlamını öyrənmək vasitəsilə ənamları və xarizmaları çoxaldır. Həvarinin öyrətdiyi kimi: «Ruh hər kəsə xeyri üçün aşkar olunur» (1 Kor 12, 7). Elə buna görə də biz Kilsəyik - Allahda yaşayan və dünyaya xidmət edən vahid bədən. Ruh sayəsində biz hamıya həqiqi sülhü və xilaskar həqiqəti gətirə bilərik. Həmin həqiqəti ki, o, Rəbbimiz Məsihdir.

Əziz dostlar, gəlin bu gün alovlu qəlblərlə dua edək ki, Dirilmişin Ruhu bizi müharibə şərindən xilas etsin; çünki müharibəyə fövqəldövlətlər deyil, məhəbbətin hər şeyə qadir qüvvəsi qalib gəlir. Dua edək ki, O, insanlığı səfalətdən azad etsin; çünki səfalət ölçüsüz sərvətlə deyil, tükənməz ilahi ənamla aradan qaldırılır. Dua edək ki, O bizi İsanın adı ilə bütün xalqlara bəyan edilən xilas vasitəsilə günahın yarasından sağaltsın. Həvarilərə cəsarət verən həmin lütf bu gün və həmişə Məryəm Ananın -  Kilsənin Anasının şəfaəti ilə bizə də verilsin.