XIV Leo: Rəbbin Göyə Yüksəlişi bizi Ataya doğru aparır, birlik və sülh yaradır
“SƏMAVİ MƏLƏKƏ”
Müqəddəs Peter Meydanı
Pasxanın VII Rəbb günü, 17 may 2026-cı il
Əziz bacılar və qardaşlar, Rəbb gününüz mübarək olsun!
Bu gün dünyanın bir çox ölkəsində Rəbbin Göyə Yüksəlişi bayramı qeyd olunur.
Müqəddəs Yazının dediyi kimi (bax: Həv. 1, 1-11), yerdən yüksələrək göyə qalxan İsanın surəti bizdə bu Sirrin çox uzaq keçmişdə baş vermiş bir hadisə olduğu düşüncəsini yarada bilər. Lakin əslində belə deyil. Çünki biz İsa ilə vahid Bədənin üzvləri kimi birləşmişik və O həmin Bədənin Başçısıdır. Buna görə də İsa göyə yüksələrkən bizi də Özü ilə birlikdə Atayla tam ünsiyyətə doğru aparır. Bu barədə Müqəddəs Avqustin belə deyirdi: «Başın yüksəlişi üzvlərin ümididir» (Vəz 265, 1.2).
Həqiqətən də, Məsihin bütün həyatı yüksəliş yoludur. O, Öz insan təbiəti vasitəsilə bütün dünyanı ağuşuna alır və onu Öz yoluna daxil edir, insanı günah vəziyyətindən xilas edir. Beləcə, O, əvvəllər qaranlıq, ədalətsizlik və ümidsizliyin hökm sürdüyü yerlərə nur, bağışlanma və ümid gətirir ki, insanlar Allah Oğlunun ölümü vasitəsilə «ölümümüzü məhv etdiyi» və dirilməsi ilə «həyatımızı bərpa etdiyi» Pasxanın qəti zəfərinə çata bilsinlər (Pasxanın I Prefasiyası).
Deməli, Göyə Yüksəliş bizə uzaq bir vəddən deyil, canlı bir bağdan danışır. Bu bağ bizi səmavi izzətə doğru çəkir, artıq bu həyatda baxışlarımızı ucaldır və genişləndirir, düşüncə, hiss və davranışlarımızı Allahın qəlbinin ölçüsünə daha da yaxınlaşdırır.
Bu yüksəliş istiqamətində biz yolu tanımış oluruq (bax: Yəh. 14, 1-6). Çünki həmin yolu İsada - Onun bizə bəxş etdiyi həyatının ənamında, Onun nümunəsində və təlimində tapırıq. Biz bu yolu həmçinin Kilsənin bütün insanlar üçün örnək kimi təqdim etdiyi şəxslərdə - Mübarək Məryəmdə və müqəddəslərdə görürük. Papa Fransisk gündəlik həyatımızda yanımızda olan, İncili sevinc, sədaqət və səmimiyyətlə yaşamağa çalışan «qonşuluqdakı müqəddəslərdən» - atalar, analar, babalar, nənələr, müxtəlif yaş və vəziyyətdə olan insanlardan da danışmağı sevirdi (bax: Apostol Nəsihəti Gaudete et Exsultate, 7).
Onlarla birlikdə, onların dəstəyi və duaları sayəsində biz də gündən-günə göyə doğru yüksəlməyi öyrənə bilərik. Müqəddəs Paulun dediyi kimi, biz həqiqi, ədalətli və sevilməyə layiq olan hər şeyə yönəlməliyik (bax: Fil. 4, 8) və Allahın köməyi ilə «eşitdiyimiz və gördüyümüz» hər şeyi həyata keçirməliyik (ayə 9). Beləcə, Vəftizdə qəbul etdiyimiz və bizi daim yüksəkliklərə, Ataya doğru çəkən ilahi həyat həm içimizdə, həm də ətrafımızda böyüyərək dünyada birlik və sülhün qiymətli bəhrələrini verə bilər.
Qoy Səmami Mələkə Məryəm bizi hər bir anda nurlandıraraq və istiqamətləndirərək bu yolda bizə dayaq olsun.
