Даследчыкі выявілі моцныя і слабыя бакі падрыхтоўкі святароў
Аляксандр Амяльчэня - Vatican News
Цэнтр даследаванняў апостальскай дзейнасці пры Джорджтаўнскім універсітэце (CARA) сумесна з Інстытутам касцельнага жыцця Макгрэта выдалі 24 верасня 2025 года грунтоўны даклад па ацэнцы прыдатнасці кандыдатаў да святарскіх пасвячэнняў, які вывучае ролю псіхалагічнага суправаджэння ў фарміраванні святароў.
Даследаванне, на якое спасылаецца “OSV News”, заснаванае на апытаннях біскупаў, адказных за пакліканні, рэктараў семінарый і спецыялістаў па псіхічным здароўі ў ЗША, выявіла, што большасць касцельных кіраўнікоў задаволеныя праграмамі фарміравання ў сваіх семінарыях. Рэспандэнты адзначылі, што навучальныя ўстановы паспяхова выхоўваюць у кандыдатаў адкрытасць да духоўнага росту і здольнасць да саманазірання, што з'яўляецца важным фундаментам для святарскага служэння.
Аднак былі выяўлены некалькі праблемных сфер, дзе фармацыя да святарства патрабуе ўмацавання. Найменш упэўненасці выказвалася ў здольнасці семінарый дапамагаць будучым святарам кіраваць сваімі псіхалагічнымі праблемамі, канструктыўна жыць з медыцынскімі абмежаваннямі, эфектыўна спраўляцца з цяжкасцямі ў навучанні і пераадольваць нездаровыя ці залежныя паводзіны.
Падчас апытання спецыялісты ў галіне псіхічнага здароўя адзначылі, што псіхалагічная ацэнка кандыдатаў часта не дастаткова глыбока ўлічвае пытанні псіхалагічнай сталасці і асабістай гісторыі будучых святароў.
Эксперты прапанавалі шэраг рэкамендацый для ўдасканалення працэсу ацэнкі, уключаючы больш глыбокае вывучэнне гісторыі і культурнага асяроддзя кандыдатаў і лепшую інтэграцыю псіхалагічных паслуг у агульную праграму фармацыі.
Даследаванне падкрэслівае, што ў часы, калі Касцёл сутыкаецца з рознымі выклікамі, якасная і грунтоўная падрыхтоўка святароў застаецца адным з найважнейшых прыярытэтаў для забеспячэння здаровага духоўнага лідарства ў будучыні.
