Турцыя і Ліван: статыстычны партрэт Касцёла перад візітам Папы
Аляксандр Амяльчэня - Vatican News
Перад апостальскім падарожжам Святога Айца ў Турцыю і Ліван, з 27 лістапада па 2 снежня 2025 года, былі прадстаўлены афіцыйныя даныя, якія адлюстроўваюць сітуацыю каталіцкай супольнасці ў гэтых краінах па стане на 31 снежня 2024 года.
Гэтыя лічбы дазваляюць лепш зразумець кантэкст, у якім будзе праходзіць візіт Пантыфіка, і паказваюць дзве зусім розныя рэальнасці прысутнасці Касцёла на Блізкім Усходзе.
Турцыя: сведчанне меншасці
У Турцыі каталіцкая супольнасць сапраўды з'яўляецца "малым статкам". Сярод больш чым 85 мільёнаў жыхароў налічваецца толькі 33 тысячы католікаў, што складае ўсяго 0,04 працэнта ад агульнай колькасці насельніцтва.
Вернікам служаць 76 святароў у 40 парафіях. Нягледзячы на сціплыя лічбы, структура Касцёла тут адметная сваёй разнастайнасцю: яна ўключае лацінскую Мітраполію ў Ізміры, вікарыяты ў Стамбуле і Анатоліі, а таксама структуры халдэйскага, армянскага, сірыйскага і візантыйскага абрадаў.
Асаблівую ўвагу прыцягвае адукацыйная і дабрачынная дзейнасць: нават пры такой невялікай колькасці вернікаў Касцёл утрымлівае 24 навучальныя ўстановы розных узроўняў і пяць бальніц, што сведчыць пра актыўнае сацыяльнае служэнне.
Ліван: моц традыцыі і колькасці
Сітуацыя ў Ліване кардынальна іншая. Тут католікі складаюць амаль 45 працэнтаў насельніцтва – больш за два мільёна вернікаў. Краіна Кедраў вылучаецца неверагодна развітой касцельнай інфраструктурай: 24 касцельныя акругі, больш за 1100 парафій і магутная армія духавенства – больш за 1500 святароў і амаль 1700 манахінь.
Ліванскі Касцёл – гэта сапраўдны стоўп грамадства, асабліва ў сферы адукацыі. Каталіцкія навучальныя ўстановы тут наведваюць сотні тысяч вучняў і студэнтаў: ад дзіцячых садкоў да ВНУ – толькі апошніх у краіне налічваецца 50.
Пакліканні і дабрачыннасць
Статыстыка пакліканняў таксама адлюстроўвае розныя маштабы: калі ў Турцыі да святарства рыхтуюцца 10 семінарыстаў, то ў Ліване іх колькасць дасягае 270.
Абедзве краіны аб'ядноўвае шырокая сетка дабрачыннасці. У Ліване дзейнічае 23 каталіцкія бальніцы, 85 амбулаторый і мноства цэнтраў дапамогі патрабуючым, што падкрэслівае жыццяздольнасць Касцёла, які, нягледзячы на палітычныя і эканамічныя цяжкасці рэгіёна, застаецца надзейнай апорай для людзей і грамадства.
