Перамога над нянавісцю: Пасха ў Базіліцы Божага Гробу
Аляксандр Амяльчэня - Vatican News
Велікоднае "Аллелюя" прагучала ў Базіліцы Божага Гробу ў атмасферы стрыманасці і вымушаных абмежаванняў. Нягледзячы на адсутнасць шматлікіх пілігрымаў і прадстаўнікоў дзяржаўных структур, кардынал П’ербатыста Піцабала, Лацінскі Патрыярх Іерусаліма, узначаліў урачыстую святую Імшу, ператварыўшы яе ў глыбокі аналіз сучаснай трагедыі Святой Зямлі.
Як падкрэсліў Патрыярх, сапраўдная надзея заключаецца ў адвазе пачынаць усё нанова. Ён перасцярог ад небяспекі "замураваць" Бога ў труне кожны раз, калі чалавек падпарадкоўваецца логіцы варожасці або лічыць "справядлівасцю" толькі падлік страт, а "мірам" – часовае ўзброенае зацішша.
Сёлетняя ўрачыстасць прайшла без прысутнасці прадстаўнікоў усходніх Касцёлаў і дыпламатычнага корпуса з-за дзяржаўных абмежаванняў, што яшчэ больш падкрэсліла самотнасць і складанасць моманту. Тым не менш, падчас рэзурэкцыйнай працэсіі вакол Труны Пана святары праспявалі ўрыўкі з чатырох Евангелляў, сімвалічна абвяшчаючы радасную вестку на ўсе чатыры бакі свету.
Гэтае святкаванне ў Базіліцы стала напамінам аб тым, што нават калі вакол гучаць галасы смерці, апошняе слова належыць не тым, хто нясе смерць, а Таму, Хто ўваскрасае.
