Біскуп Лопес узначаліў Ардынарыят для былых англікан Аўстраліі
Аляксандр Амяльчэня - Vatican News
Гэтая кадравая перастаноўка адбылася пасля таго, як папярэдні кіраўнік структуры, біскуп Энтані Рандаца, атрымаў прызначэнне на пасаду Прэфекта Дыкастэрыі па заканадаўчых тэкстах у Ватыкане.
Новы адміністратар, біскуп Стывен Джозэф Лопес, з’яўляецца прызнаным экспертам у галіне інтэграцыі супольнасцей англіканскай традыцыі, паколькі ўжо дзесяць гадоў узначальвае аналагічны Ардынарыят "Пасад святога Пятра" ("The Chair of Saint Peter") у Злучаных Штатах Амерыкі і Канадзе.
Персанальны Ардынарыят "Маці Божая Паўднёвага Крыжа" ("Our Lady of the Southern Cross") – гэта асаблівая касцельная структура, падобная да дыяцэзіі, але без тэрытарыяльных меж. Яна была створана спецыяльна для тых груп вернікаў і духоўных асоб англіканскай супольнасці, якія пажадалі ўвайсці ў поўную еднасць з Каталіцкім Касцёлам. Галоўная мэта такой структуры – дазволіць людзям стаць католікамі, не губляючы пры гэтым сваю самабытную англійскую духоўнасць, асаблівую літургію і душпастырскія традыцыі.
Біскуп Стывен Лопес, сын настаўнікаў з Каліфорніі, мае выключную падрыхтоўку для гэтай місіі. Пасля навучання ў Рыме і Інсбруку ён стаў доктарам тэалогіі. Яго шлях цесна звязаны з Рымскай курыяй: на працягу дзесяці гадоў ён працаваў у Кангрэгацыі веравучэння, дзе займаў пасаду сакратара кардынала-прэфекта. Гэты вопыт дазволіў яму непасрэдна ўдзельнічаць у распрацоўцы норм, паводле якіх англіканскія супольнасці сёння існуюць у лоне Каталіцкага Касцёла.
Зараз іерарх будзе сумяшчаць кіраванне паўночнаамерыканскім Ардынарыятам з абавязкамі Апостальскага адміністратара ў Аўстраліі.
Яго прызначэнне падкрэслівае жаданне Папы Льва XIV забяспечыць духоўную пераемнасць і падтрымку для вернікаў, якія шукаюць адзінства, захоўваючы вернасць сваім караням.
