Пакліканні да святарства ў Еўропе: рост у Францыі, спад у Германіі
Ян Глінскі
Апошнія даныя прадставілі неадназначны малюнак каталіцызму. У той час як Германія працягвае змагацца з глыбокім крызісам пакліканняў, у Францыі працягваецца нечаканае рэлігійнае абнаўленне, а ў Італіі з’явілася новае пакаленне семінарыстаў, чый профіль кідае выклік даўнім стэрэатыпам аб святарстве.
Францыя: вера як асабісты выбар
Сёлета ва ўрачыстасць святых апосталаў Пятра і Паўла прэзбітэрскія пасвячэнні ў Францыі прынялі 84 дыяканы, што на пяць чалавек больш, чым у 2025 годзе. 66 з іх дыяцэзіяльныя святары, а 18 належаць да манаскіх супольнасцяў. Адначасова працягваецца рост колькасці навяртанняў сярод дарослых. На Вялікдзень 2025 года хрост прынялі 17,7 тысяч катэхуменаў – з іх 10,3 тысяч дарослыя і 7,4 тысяч падлеткі. У параўнанні з папярэднім годам гэта складае 45 працэнтаў і 33 працэнты ўзросту адпаведна. Многія з катэхуменаў прымаюць каталіцкую веру не ў спадчыну ад сям’і, а дзякуючы асабістаму шляху пошуку.
Акрамя гэтага ўсё большай папулярнасцю карыстаецца штогадовая пілігрымка ў Шартр, дзе знаходзіцца адзін з галоўных марыйных санктуарыяў Францыі. За апошнія тры гады колькасць пілігрымаў узрасла на 45 працэнтаў, дасягнуўшы амаль 20 тысяч пілігрымаў з усяго свету, сярэдні ўзрост якіх складае ўсяго 22 гады.
Германія: спад веры і пакліканняў
У Германіі назіраецца цалкам адваротны малюнак. Паводле статыстычных даных, у гэтай краіне адбываецца найбольшы спад колькасці вернікаў. Толькі за мінулы год 549 тысяч католікаў афіцыйна выйшлі з Касцёла ў Германіі. Сітуацыя з пакліканнямі мае падобную тэнтэнцыю: у 2026 годзе ў 11 з 27 дыяцэзій не было ўдзелена ніводнага прэзбітэрскага пасвячэння, у тым ліку ў адным з самых каталіцкіх рэгіёнаў краіны – архідыяцэзіі Мюнхен-Фрайзінг. Па ўсёй Германіі ў гэтым годзе плануецца толькі 30 пасвячэнняў. Хоць гэта нязначнае паляпшэнне ў параўнанні з 25 пасвячэннямі, зарэгістраванымі ў 2025 годзе, і 29 у 2024 годзе, агульная тэндэнцыя застаецца відавочнай.
Італія: ад прафесійнага поспеху да святарства
У Італіі колькасць семінарыстаў скарацілася з 6337 у 1970 годзе да 1804 на пачатку бягучага дзесяцігоддзя. Аднак сённяшнія пакліканні істостна адрозніваюцца ад папярэдніх пакаленняў: у семінарыю ўсё часцей прыходзяць людзі з багатым жыццёвым вопытам. Амаль палова кандыдатаў да святарства ўжо працавала па прафесіі да паступлення ў семінарыю, і прыкладна кожны другі мае вышэйшую адукацыю, часта ў галіне тэхнічных навук.
Паводле партала “Zenit”, адно толькі колькаснае зніжэнне пакліканняў не дае поўнай карціны. Францыя дэманструе, што навяртанні і святарскія пакліканні могуць адбывацца нават у моцна секулярызаваных грамадствах. На прыкладзе Італіі бачна, што і прафесійна паспяховыя дарослыя могуць адкрываць у сабе пакліканне да святарства. Германія ж, наадварот, ілюструе глыбокія праблемы, звязаныя з перадачай веры наступным пакаленням.
