Леў XIV: малітва за памерлых нагадвае, што наша айчына ў небе
Аляксандр Панчанка - Vatican News
“У бліжэйшыя дні літургія будзе ўспамінаць памерлых вернікаў. Малітва за нашых блізкіх няхай нагадвае нам, што наша айчына – у небе. Няхай намаганні дзеля дасягнення часовых дабротаў, неабходных у зямным жыцці, заўсёды зыходзяць з любові і вернасці праўдзе Евангелля, якая не мінае, бо мае сваю крыніцу ў самім Богу”, - падкрэсліў Святы Айцец, вітаючы пілігрымаў з Польшчы.
Успамін усіх памерлых адзначаецца ў Каталіцкім Касцёле 2 лістапада. У гэты дзень Папа звычайна здзяйсняе малітоўны візіт на могілкі. 3 лістапада Леў XIV узначаліць святую Імшу ў ватыканскай базіліцы, падчас якой будзе маліцца за свайго папярэдніка, спачылага Папу Францішка, а таксама за кардыналаў і біскупаў, якія адышлі ў вечнасць цягам года.
