Пантыфік прапанаваў новы прававы “каркас” для Рымскай курыі
Аляксандр Амяльчэня - Vatican News.
Ва ўрачыстасць Хрыста Валадара Сусвету, 23 лістапада 2025 года, Пантыфік падпісаў новы "Рэгламент для персаналу Рымскай Курыі" і новы "Агульны рэгламент для Рымскай Курыі". Гэтыя грунтоўныя дакументы закліканы уніфікаваць і ўпарадкаваць працоўныя адносіны ў Дзяржаўным сакратарыяце, дыкастэрыях і іншых установах Святога Пасада, робячы акцэнт на прафесіяналізме і эканамічнай празрыстасці.
Каардынацыя і сумесная адказнасць
Асобныя главы рэгламенту прысвечаныя кансісторыям, нарадам кіраўнікоў устаноў, міждыкастэрыяльным сесіям і пастаянным камісіям, што павінна забяспечыць узгоднены курс дзейнасці Курыі і агульнае разуменне прыярытэту Папы.
Дакумент падкрэслівае, што важнейшыя рашэнні і “пытанні выключнай вагі” павінны своечасова выносіцца на разгляд Пантыфіка, а таксама што дыкастэрыі не могуць самастойна змяняць універсальнае права Касцёла без яго спецыфічнага адабрэння.
Генеральны рэгламент падрабязна апісвае працэдуру падрыхтоўкі дакументаў: ад працы офісаў і кансультантаў да абавязковага тэалагічнага і юрыдычнага разгляду ў адпаведных дыкастэрыях перад падачай тэксту Папу.
Перад публікацыяй найбольш значныя тэксты павінны быць прадстаўлены біскупам праз апостальскіх нунцыяў, а затым растлумачаны грамадскасці ў супрацоўніцтве з Дыкастэрыяй па камунікацыі.
Ад архіваў да лічбавых сістэм
Рэгламент надае вялікую ўвагу дакладнаму вядзенню архіваў і пратаколу, патрабуючы належнай аховы дакументаў і рэгулярнай перадачы матэрыялаў у Апостальскі архіў.
Асобны артыкул закранае інфармацыйныя сістэмы: набыццё і выкарыстанне тэхналогій павінна адпавядаць нормам у галіне закупак і праходзіць тэхнічную валідацыю Сакратарыята па эканоміцы.
Асоба і праца ў Курыі
Цэнтральным элементам новага “Рэгламенту для персаналу Рымскай Курыі" становіцца выключная роля Сакратарыята па эканамічных пытаннях. Менавіта гэтая структура цяпер будзе ўзгадняць любы штатны расклад, зацвярджаць бюджэты і даваць дазвол ("nulla osta") на любы найм супрацоўнікаў, ад кіраўнікоў да тэхнічнага персаналу.
Дакумент дакладна вызначае іерархію і падпарадкаванне, падкрэсліваючы, што кожны супрацоўнік, незалежна ад пасады, павінен адпавядаць высокім маральным крытэрыям, вызнаваць каталіцкую веру і мець бездакорную рэпутацыю.
Асобная ўвага надаецца працэдуры прыёму на працу. Для свецкіх супрацоўнікаў уводзіцца абавязковы выпрабавальны тэрмін ад аднаго да двух гадоў, пасля якога прымаецца рашэнне аб канчатковым залічэнні ў штат.
Святары і кансэкраваныя асобы, як правіла, будуць наймацца на пяцігадовы кантракт з магчымасцю аднаразовага падаўжэння, што дазволіць захоўваць ратацыю кадраў і сувязь з мясцовым Касцёлам.
Важным новаўвядзеннем стала строгая забарона на працу сваякоў у адной установе да чацвёртага калена, каб пазбегнуць канфлікту інтарэсаў.
Жорсткія дысцыплінарныя нормы, правілы паводзін і пенсійны ўзрост
Рэгламент дэталёва апісвае абавязкі персаналу, якія выходзяць далёка за межы прафесійных кампетэнцый. Супрацоўнікі Курыі абавязаны захоўваць "службовую таямніцу" і "пантыфікальную таямніцу", а таксама ўстрымлівацца ад любых несанкцыянаваных інтэрв'ю ці каментароў СМІ.
Дакумент забараняе прымаць падарункі, выкарыстоўваць службовае становішча ў прыватных мэтах і нават патрабуе ўзгаднення любой знешняй дзейнасці. Парушэнне гэтых норм цягне за сабой градацыю пакаранняў: ад вуснай заўвагі да звальнення і "звальнення па законе" (destituzione di diritto) у выпадку сур'ёзных злачынстваў.
Вызначаны і межы працоўнай актыўнасці. Кіраўнікі дыкастэрый і сакратары павінны падаваць прашэнне аб адстаўцы ва ўзросце 75 гадоў, у той час як для свецкіх кіраўнікоў мяжа ўстаноўлена на ўзроўні 70 гадоў.
Тэкст таксама ўключае нормы аб водпусках, бальнічных і дэкрэтных адпачынках, гарантуючы сацыяльную абарону, але патрабуючы строгага выканання працоўнага графіку.
Рэгламент зацверджаны "ad experimentum" тэрмінам на пяць гадоў, што пакідае прастору для далейшага ўдасканалення сістэмы кіравання Святым Пасадам.
