Святы Айцец сустрэнецца з італьянскім епіскапатам у Асізіі
Аляксандр Панчанка - Vatican News
Італьянскія касцельныя іерархі збяруцца ў горадзе святога Францішка на штогадовае пасяджэнне, якое будзе праходзіць з 17 па 20 лістапада. Нараду адкрые кардынал Матэа Дзупі, старшыня епіскапату.
Праграма форума ўключае вызначэнне душпастырскіх прыярытэтаў на бліжэйшыя гады, малітву за ахвяр злоўжыванняў і зацвярджэнне дакументаў, якія датычацца навучання каталіцкай веры ў школах. За дзень да візіту Папы, 19 лістапада, біскупы правядуць супольную малітву за мір, пасля якой кардынал Дзупі скіруе адмысловы заклік.
Леў XIV упершыню здзейсніць візіт у Асізі пасля свайго абрання Наступнікам святога Пятра. Яго папярэднік, Францішак некалькі разоў наведваў гэты невялікі горад у вобласці Умбрыя, звязаны з жыццём галоўнага нябеснага апекуна Італіі – святога Францішка.
