Святы Айцец: неадкладна вызваліць заложнікаў у Нігерыі і Камеруне
Аляксандр Панчанка - Vatican News
“Я з вялікім смуткам даведаўся пра выкраданні святароў, вернікаў і студэнтаў у Нігерыі і Камеруне. Мне асабліва балюча за шматлікіх выкрадзеных юнакоў і дзяўчат, і за іх сем’і, ахопленыя трывогай. Звяртаюся з шчырым заклікам неадкладна вызваліць заложнікаў і заклікаю кампетэнтныя ўлады прыняць адпаведныя і своечасовыя рашэнні, каб забяспечыць іх вызваленне. Будзем маліцца за гэтых нашых братоў і сясцёр, а таксама аб тым, каб заўсёды і ўсюды касцёлы і школы заставаліся месцамі бяспекі і надзеі”, - сказаў Святы Айцец.
Малітва і абдымкі для Украіны
Пантыфік прывітаў пілігрымаў і падзякаваў удзельнікам Юбілею хораў і музычных калектываў за іх служэнне. Асаблівым чынам ён звярнуўся да вернікаў з Украіны. “Забярыце з сабой на радзіму абдымкі і малітву гэтай плошчы”, - сказаў ім Папа.
Адкрыць прыгажосць і радасць наследавання Пана
Святы Айцец нагадаў, што ва ўрачыстасць Хрыста, Валадара Сусвету, на дыяцэзіяльным узроўні адзначаецца Сусветны дзень моладзі. “Благаслаўляю і духоўна абдымаю ўсіх, хто ўдзельнічае ў розных урачыстасцях і ініцыятывах. Ва ўрачыстасць Хрыста Валадара я малюся, каб кожны малады чалавек адкрыў прыгажосць і радасць следавання за Ім, Панам, і прысвячэння сябе Яго Валадарству любові, справядлівасці і міру!”, - сказаў Леў XIV.
