Леў XIV прыбыў у горад двух кантынентаў: стамбульскі этап
Аляксандр Амяльчэня - Vatican News
Паветранае падарожжа "Airbus A320neo" авіякампаніі "Ita Airways" працягласцю ў гадзіну і дзесяць хвілін завяршылася каля 19.30 па мясцовым часе. Пераадолеўшы 435 кіламетраў над тэрыторыяй Турцыі, борт з Папам прызямліўся ў аэрапорце імя Атацюрка.
Згодна з праграмай, прыём на ўзлётнай паласе насіў падкрэслена прыватны характар: Святога Айца сустрэлі прадстаўнікі мясцовых улад, аднак урачыстых пратакольных цырымоній прадугледжана не было.
Гістарычнае сэрца рэгіёна
Стамбул, куды прыбыў Наступнік Пятра, уяўляе сабой унікальны феномен – гэта адзіны мегаполіс свету, які раскінуўся адразу на двух кантынентах, злучаючы Еўропу і Азію, Чорнае мора з Міжземным.
Былая сталіца Асманскай імперыі, спадчынніца Візантыі і Канстантынопаля, сёння з'яўляецца домам для прыкладна 16 мільёнаў чалавек, што робіць яе самым населеным муніцыпальным цэнтрам Еўропы.
Нягледзячы на страту сталічнага статусу, горад застаецца галоўным культурным і рэлігійным сэрцам краіны, захоўваючы сваё значэнне як рэзідэнцыя Канстантынопальскага Патрыярхату.
Візіт праходзіць на фоне няпростай сейсмічнай сітуацыі. Турцыя знаходзіцца ў зоне актыўных тэктанічных разломаў, і памяць пра разбуральны землятрус 2023 года, які забраў дзясяткі тысяч жыццяў, яшчэ свежая. Нават нядаўна, у канцы кастрычніка 2025 года, падземныя штуршкі выразна адчуваліся і тут, у Стамбуле, што надае прысутнасці Папы асаблівае вымярэнне салідарнасці.
Завяршэнне дня ў цішыні
Адразу пасля прызямлення, каля 19.45 па мясцовым часе, картэж Пантыфіка накіраваўся ў мясцовую апостальскую дэлегатуру. Шлях да дыпламатычнага прадстаўніцтва Святога Пасада складае 24 кіламетры.
Праграма першага дня апостальскага падарожжа завяршылася прыватнай вячэрай, якая дала магчымасць Льву XIV адпачыць перад наступнымі днямі знаходжання на турэцкай зямлі.
