Леў XIV накіраваўся ў Стамбул пасля насычанага дня ў Анкары
Аляксандр Амяльчэня - Vatican News
Апошнім акордам знаходжання Пантыфіка ў сталіцы стаў вылет з міжнароднага аэрапорта “Анкара-Эсенбага”. Борт "Airbus A320neo" авіякампаніі "Ita Airways" падняўся ў неба ў 18.35 па мясцовым часе.
Наперадзе ў Святога Айца – сустрэча са Стамбулам, найбуйнейшым горадам свету, які ўнікальным чынам злучае Азію і Еўропу. Праграма знаходжання ў Турцыі працягнецца да нядзелі, 30 лістапада 2025 года, пасля чаго Папа накіруецца ў Ліван.
Сімвалічны пачатак візіту
Падзеі гэтага дня развіваліся імкліва. Яшчэ раніцай, у 10.22, самалёт з Пантыфікам на борце прызямліўся ў Анкары, дзе ля трапа яго вітаў міністр культуры і турызму краіны Мехмет Нуры Эрсой. Аддаючы даніну павагі гісторыі краіны, Пантыфік наведаў Маўзалей Атацюрка, пакінуўшы запіс у Кнізе ганаровых гасцей.
Дыпламатычная частка працягнулася пасля поўдня ў прэзідэнцкім палацы. Тут адбылася знакавая сустрэча з прэзідэнтам Рэджэпам Таіпам Эрдаганам, якая падкрэсліла важнасць дыялогу на вышэйшым узроўні. Пасля прыватнай размовы і цырымоніі прывітання ў Нацыянальнай бібліятэцы прагучала прамова Святога Айца, звернутая да прадстаўнікоў улады, грамадзянскай супольнасці і дыпламатычнага корпуса.
Слова да народа і рэлігійны дыялог
Важным элементам праграмы стаў візіт ва Упраўленне па справах рэлігіі (Diyanet). Леў XIV правёў кароткую, але змястоўную гутарку з кіраўніком ведамства Сафі Арпагушам, што стала чарговым крокам у справе міжрэлігійнага паразумення.
Перад ад'ездам у аэрапорт Пантыфік наведаў апостальскую нунцыятуру. Цікавая дэталь, якая характарызуе стыль цяперашняга пантыфікату: вылет адбыўся з невялікай затрымкай. Прычынай стала шчырае жаданне Папы спыніць картэж каля адной з парафій, каб з аўтамабіля асабіста прывітаць вернікаў, якія сабраліся на вуліцы ў чаканні свайго Пастыра.
