Пантыфік у Кастэль-Гандольфа: дапамога Газе не можа чакаць
Аляксандр Амяльчэня - Vatican News
27 мая 2026 года, завяршаючы свой кароткі адпачынак на Віле Барберыні, Леў XIV адказаў на пытанні журналістаў. Асноўная ўвага падчас размовы была нададзена вострай гуманітарнай сітуацыі ў сектары Газа і лёсу актывістаў "Global Sumud Flotilla", якія былі затрыманы ізраільскім войскам пры спробе даставіць дапамогу.
Каментуючы сведчанні ўдзельнікаў місіі пра збіццё і жорсткае абыходжанне, Папа падкрэсліў, што такія метады толькі "правакуюць усё больш і больш нянавісці". "Гвалт не дапамагае", - дадаў ён, адзначыўшы неабходнасць вяртання да перамоў і вырашэння праблем праз шчыры дыялог, які грунтуецца на павазе да правоў кожнага чалавека.
Пантыфік звярнуў увагу на тое, што жыхары Газы да гэтага часу застаюцца без належнай гуманітарнай падтрымкі. Менавіта гэты вакуум спачування і дапамогі выклікае пратэсты і вымушае людзей да адчайных крокаў. Леў XIV звярнуўся да ўсіх адказных асоб з заклікам падтрымаць шматпакутны народ і ўжо цяпер пачынаць працу па аднаўленні рэгіёна.
Другой ключавой тэмай размовы стала развіццё штучнага інтэлекту, што супала з выхадам новай энцыклікі Святога Айца "Magnifica humanitas". Папа заклікаў не спыняць кантакты з буйнымі тэхналагічнымі карпарацыямі. Прыкладам такога ўзаемадзеяння з'яўляецца праца Дыкастэрыі па служэнні інтэгральнаму развіццю чалавека з кампаніяй "Anthropic".
"Я лічу вельмі важным працягваць дыялог і сапраўды імкнуцца да абяззброенага штучнага інтэлекту", - заявіў Леў XIV. Ён выказаў глыбокую занепакоенасць тым, што сучасныя ваенныя дзеянні, як у Ліване, так і ў іншых частках свету, усё часцей вядуцца з прымяненнем алгарытмаў, якія "не зважаюць на чалавечыя жыцці". Менавіта таму новы заклік да міру становіцца сёння маніфестам абароны чалавека перад тварам некантраляваных тэхналогій.
