Папа ўзначаліць пасвячэнне чатырох біскупаў для Вечнага горада
Аляксандр Амяльчэня - Vatican News
Усе кандыдаты паходзяць з мясцовага духавенства і маюць багаты вопыт парафіяльнага служэння. Гэта ксяндзы Стэфана Спарапані, Алесандра Дзэнобі, Андрэа Карлевале і Марка Валенці. Кожны з іх доўгія гады працаваў пробашчам у розных кутках італьянскай сталіцы, добра ведаючы штодзённыя патрэбы і радасці вернікаў.
Пра прызначэнне гэтых святароў было абвешчана ў лютым 2026 года. Кардынал Бальдасарэ Рэйна, папскі вікарый для Рымскай дыяцэзіі, адзначыў тады, што ўсе чатыры прэзбітэры карыстаюцца вялікай павагай сярод духавенства і народа. Ён таксама шчыра падзякаваў братам за іх гатоўнасць дапамагаць мясцоваму Касцёлу. Па словах іерарха, новыя біскупы заўсёды вызначаліся "духам служэння".
Ксяндзы Стэфана Спарапані і Алесандра Дзэнобі з нядаўняга часу з'яўляюцца біскупскімі вікарыямі Паўночнага і Заходняга сектараў адпаведна. Ксяндзы Андрэа Карлевале і Марка Валенці таксама маюць за плячыма дзесяцігоддзі плённай душпастырскай працы ў рымскіх супольнасцях. Іх багаты жыццёвы, акадэмічны і тэалагічны вопыт цяпер будзе выкарыстоўвацца для кіравання сталічнай дыяцэзіяй на новым узроўні адказнасці.
Базіліка Святога Яна на Латэране, якая з'яўляецца кафедрай Біскупа Рыма, стане сёння вечарам цэнтрам урачыстасці. Менавіта тут Пантыфік ускладзе рукі на новых іерархаў, каб яны маглі дапамагаць яму ў эфектыўным абвяшчэнні Евангелля ў сучасным свеце.
