“Bambino Gesù” адчыніць дзверы лабараторый для дзяцей і падлеткаў
Марыя Валодзіна - Vatican News
Наведвальнікаў чакае насычаная праграма: з 18:00 да 23:00 яны змогуць паўдзельнічаць у лабараторных эксперыментах, паспрабаваць сябе ў інтэрактыўных гульнях, здзейсніць 3D-вандроўкі па чалавечым целе і даследаваць штучны інтэлект. Будзе магчымасць пазнаёміцца з мікрабіётай, імуннай сістэмай, сакрэтамі скуры і нейранавукай, якая дазваляе зразумець, як мозг рэагуе на стымулы, ператвараючы эмоцыі ў інструменты для дабрабыту дзяцей.
Маленькіх наведвальнікаў чакаюць тэматычныя стэнды і экскурсіі па лабараторыях, дзе даследчыкі пакажуць ім, як навуковыя ідэі і адкрыцці ператвараюцца ў новыя метады тэрапіі. Акрамя таго, адбудуцца майстар-класы па здаровым ладзе жыцця для дзяцей і падлеткаў.
Арганізатары імкнуцца паказаць маладому пакаленню, як навуковыя адкрыцці могуць палепшыць жыццё пацыентаў, а таксама зацікавіць дзяцей у прафесіі медыка або навукоўца.
Для ўдзелу ў мерапрыемстве неабходна зарэгістравацца на афіцыйным сайце арганізатараў. Там жа можна азнаёміцца з раскладам, падрабязнай праграмай і дадатковай інфармацыяй.
