“Вежа Езуса Хрыста”: Саграда Фамілія – самы высокі касцёл свету
Аляксандр Амяльчэня - Vatican News
Пасля больш чым стагоддзя будаўніцтва, “Вежа Езуса Хрыста” хутка ўвянчае базіліку Саграда Фамілія ў Барселоне. Хардзі Фаўлі, галоўны архітэктар праекта, паведаміў, што цэнтральны шпіль і яго верхавіна ўжо гатовыя, а зараз рабочыя фарміруюць крыж, які ўвянчае збудаванне.
"Крыж складаецца з сямі вялікіх частак, якія будуць падняты кранам. Мы плануем завяршыць працу ў наступныя месяцы", - адзначыў Фаўлі 23 верасня 2025 года.
Будаўніцтва базілікі пачалося ў 1882 годзе. Яна лічыцца шэдэўрам Гаўдзі, католіка, чый беатыфікацыйны працэс зараз працягваецца. Аб'ект уключаны ў Спіс сусветнай спадчыны ЮНЭСКА.
“Вежа Езуса Хрыста” з'яўляецца сэрцам праекта Гаўдзі і адыгрывае галоўную ролю ў архітэктурным плане. З вышынёй больш за 172 метра вежа зробіць Базіліку Святой Сям’і ў Барселоне самым высокім хрысціянскім храмам у свеце, перавысіўшы лютэранскі Ульмскі Сабор у Германіі (162 метры) і каталіцкую базіліку Маці Божай Міру ў Кот-д'Івуары (158 метраў).
Пасля завяршэння вежы рабочыя пачнуць будаваць Капліцу Унебаўзяцця з гіпербалічным купалам і скульптурамі святых.
Чакаецца, што асноўны будынак будзе скончаны да 2026 года, што супадзе са 100-годдзем з дня смерці Гаўдзі, аднак работы над скульптурамі і іншымі элементамі працягнуцца да 2034 года.
