Крызіс на Гаіці і ўраган “Меліса”: голас Святога Пасада
Аляксандр Амяльчэня - Vatican News
Прадстаўнік Святога Пасада пры Арганізацыі Амерыканскіх Дзяржаў (ААД) выступіў 5 лістапада 2025 года ў Вашынгтоне з двума зваротамі, прысвечанымі драматычным падзеям у Карыбскім рэгіёне. Мансеньёр Хуан Антоніа Крус Сэрана засяродзіў увагу на шматмерным крызісе на Гаіці, а таксама на разбуральных наступствах урагану “Меліса”.
Гаворачы пра сітуацыю на Гаіці, ватыканскі дыпламат назваў яе “драматычнай рэчаіснасцю”, выкліканай адсутнасцю бяспекі, беднасцю і насіллем. Ён працытаваў словы Папы Льва XIV, які заклікаў міжнародную супольнасць не адварочвацца, а па-сапраўднаму ўспрыняць боль гаіцянскага народа.
Крус Сэрана пацвердзіў блізкасць Святога Пасада і яго падтрымку намаганняў па ўсталяванні міру і стабільнасці ў краіне.
У другім звароце прадстаўнік Святога Пасада перадаў смутак і малітоўную блізкасць Папы жыхарам краін, якія пацярпелі ад урагану “Меліса”: Ямайкі, Гаіці, Дамініканскай Рэспублікі, Кубы і Багамскіх Астравоў. Ён запэўніў, што Касцёл праз свае дабрачынныя арганізацыі, такія як “Caritas” і “Catholic Relief Services”, ужо дапамагае ахвярам стыхіі.
Абодва выступленні прагучалі як адзіны заклік. Дыпламат нагадаў пра “імператыў клапаціцца пра прыроду праз канкрэтныя дзеянні і, перш за ўсё, праз важныя нацыянальныя і міжнародныя палітычныя рашэнні”. Ён падкрэсліў, што клопат і абарона стварэння, як і салідарнасць з народамі, якія пакутуюць, – гэта адказнасць кожнага.
