ААН: Святы Пасад у абарону палестынскіх бежанцаў і UNRWA

Аляксандр Амяльчэня - Vatican News

Пастаянны назіральнік Святога Пасада пры ААН, арцыбіскуп Габрыэле Кача, выступаючы на 80-й сесіі Генеральнай Асамблеі, выказаў глыбокую занепакоенасць напружанасцю на Блізкім Усходзе. Ён пацвердзіў падтрымку рашэння аб існаванні дзвюх дзяржаў – Ізраіля і Палесціны, якія жывуць у міры і бяспецы, і падкрэсліў, што сапраўдны прагрэс дасягаецца праз дыялог, а не сілу.

Ватыканскі дыпламат высока ацаніў жыццёва важную місію UNRWA, якое больш за 70 гадоў аказвае гуманітарную дапамогу, уключаючы адукацыю і медыцынскія паслугі, у Ліване, Сірыі, Іарданіі і Палесціне.

Арцыбіскуп Кача асудзіў напады на аб'екты Агенцтва, заклікаў паважаць міжнароднае гуманітарнае права і забяспечыць бесперашкодны доступ для дапамогі.

Было падкрэслена, што дзейнасць UNRWA павінна грунтавацца на прынцыпах гуманнасці, нейтральнасці і незалежнасці. Святы Пасад заклікаў усе дзяржавы ўмацаваць палітычную і фінансавую падтрымку Агенцтва, бо яно з'яўляецца адзінай крыніцай дапамогі для соцень тысяч палесцінцаў. Любыя змены ў мандаце UNRWA павінны адбывацца ў рамках Генеральнай Асамблеі, адлюстроўваючы волю ўсёй міжнароднай супольнасці.