Святы Пасад заклікаў АБСЕ абараніць ахвяр гандлю людзьмі

Аляксандр Амяльчэня - Vatican News

На канферэнцыі ў Вене місія Святога Пасада звярнула ўвагу на трагедыю людзей, якіх эксплуататары прымушаюць да супрацьпраўных дзеянняў. Часта жанчыны, дзеці і мігранты становяцца інструментам у руках крыміналітэту, пасля чаго памылкова ўспрымаюцца правасуддзем як злачынцы, а не як ахвяры, якія маюць патрэбу ў клопаце і справядлівасці.

Прымус да злачынства не павінен ператвараць ахвяру ў аб’ект судовага пераследу

Дэлегацыя спаслалася на пазіцыю Папы Льва XIV, які папярэджвае пра рост кібер-рабства. У сеціве людзей прымушаюць удзельнічаць у фінансавых махінацыях і махлярстве.

Касцёл настойвае на захаванні прынцыпу непакарання: тыя, хто ўчыніў правапарушэнне пад прымусам, не павінны несці крымінальную адказнасць. Больш за тое, Святы Пасад заклікае ануляваць судзімасці ахвярам, якія былі пакараныя несправядліва.

Сапраўдная бяспека пачынаецца з абароны чалавечай годнасці, а не з жорсткага міграцыйнага кантролю

Святы Пасад заклікаў дзяржавы АБСЕ змагацца з першапрычынамі гандлю людзьмі – беднасцю і сацыяльнай ізаляцыяй. Неабходна ўзмацніць кантроль за вярбоўкай у інтэрнэце і спыніць дзейнасць махлярскіх цэнтраў, аб’яднаўшы намаганні ўлад, рэлігійных супольнасцей і грамадзянскай супольнасці. Справядлівасць магчымая толькі тады, калі ахвяра атрымлівае дапамогу, а не новыя пакуты ад рук закона.