Джэй Дзі Вэнс падчас сустрэчы з Львом XIV у Ватыкане

Свет

Віцэ-прэзідэнт ЗША: "Magnifica humanitas" – глыбокі дакумент

Віцэ-прэзідэнт Злучаных Штатаў Джэй Дзі Вэнс назваў новую энцыкліку Льва XIV "Magnifica humanitas" глыбокім дакументам, які актуалізуе сацыяльнае вучэнне Касцёла ў сучасных умовах.

Аляксандр Амяльчэня - Vatican News

26 мая 2026 года віцэ-прэзідэнт Злучаных Штатаў Джэй Дзі Вэнс у размове з журналістамі тэлеканала "NBC News" падзяліўся сваімі думкамі наконт новай энцыклікі Папы Льва XIV.

Палітык, які з’яўляецца католікам, высока ацаніў значэнне дакумента "Magnifica humanitas", апублікаванага за дзень да гэтага. На яго думку, праца Святога Айца мае "глыбокае значэнне" для сучаснага верніка і грамадства ў цэлым.

Справа не ў змене ісціны, а ў яе разуменні сёння

"У пытаннях маральнасці прынцыпы ніколі не мяняюцца, але мяняецца спосаб іх прымянення, паколькі свет змяняецца", - падкрэсліў Вэнс. Хоць віцэ-прэзідэнт яшчэ не паспеў азнаёміцца з поўным тэкстам паслання, прачытаныя фрагменты ён палічыў надзвычай змястоўнымі. Паводле яго слоў, менавіта такой глыбіні варта чакаць ад вышэйшага іерарха Касцёла.

Новыя выклікі патрабуюць абнаўлення позірку

Асаблівую ўвагу амерыканскі палітык звярнуў на неабходнасць развіцця касцельнага вучэння ў эпоху новых тэхналогій. Ён адзначыў, што з’яўленне новых форм вядзення вайны патрабуе перагляду і ўдакладнення такіх фундаментальных паняццяў, як, напрыклад, дактрына "справядлівай вайны".

Вэнс лічыць, што Папа Леў XIV робіць важную спробу асэнсаваць сацыяльнае вучэнне Касцёла ў святле трансфармацый, праз якія праходзіць чалавецтва.

Закранаючы тэму ранейшай крытыкі на адрас Святога Пасада па пытанні палітыкі ў дачыненні да Ірана, віцэ-прэзідэнт пацвердзіў сваю павагу да Пантыфіка. Ён падкрэсліў, што хоць дзяржаўная палітыка Злучаных Штатаў застаецца прэрагатывай прэзідэнта, ён шчыра захапляецца Львом XIV як "прыхільнікам міру".

Джэй Дзі Вэнс выказаў задавальненне тым, што Папа працягвае быць моцным маральным голасам у свеце, які няспынна мяняецца.