У Рыме пройдзе “Ватыканскі саміт па даўгалецці”
Аляксандр Амяльчэня - Vatican News
Цэнтр інтэгральнай падрыхтоўкі Еўрапейскага рымскага ўніверсітэта (UER) рыхтуе маштабную міжнародную сустрэчу – “Ватыканскі саміт па даўгалецці” (Vatican Longevity Summit). Мерапрыемства прыме Папскі атэнэум “Regina Apostolorum” у Рыме 25-26 мая 2026.
Вынікам інтэнсіўнай працы экспертаў стане прэзентацыя “Этычнай хартыі даўгалецця”, якая ўбярэ ў сябе супольныя разважанні ўдзельнікаў форуму.
Глыбокі пошук адказаў на выклікі часу праз прызму навукі
Саміт, які пройдзе пад патранатам Папскай акадэміі жыцця, рэалізуецца пры садзейнічанні Міжнароднага інстытута нейрабіяэтыкі (IINBE) і арганізацыі “Brain Circle Italia”.
Праграма ахоплівае чатыры ключавыя напрамкі: навуку аб даўгалецці, даследаванні мозгу і нейранавуку, біятэхналогіі і рэгенерацыю, а таксама мастацтва, філасофію і этыку.
Сярод дакладчыкаў – выдатныя прадстаўнікі сусветнай навукі. Сваім вопытам падзеляцца лаўрэат Нобелеўскай прэміі ў галіне медыцыны Томас Зюдхоф, піянер клеткавага перапраграмавання Хуан Карлас Ізпісуа Бельмонтэ, даследчык стваловых клетак Расці Гейдж, а таксама Хіраміцу Накаучы са Стэнфардскага ўніверсітэта і эксперт па старэнні клетак Гвіда Кромер.
Голас сумлення ў свеце высокіх тэхналогій
Старшыня Міжнароднага інстытута нейрабіяэтыкі ксёндз Альберта Карара падкрэслівае, што разважанне над даўгалеццем азначае прызнанне велізарнай вартасці і надзеі кожнай асобы. Паводле яго слоў, важна заахвочваць міждысцыплінарны дыялог, каб верна акрэсліць будучыя крокі чалавецтва і змясціць чалавека ў цэнтр навуковага пошуку.
Ксёндз Энрыка Трона, дырэктар Цэнтра інтэгральнай падрыхтоўкі, адзначае, што тэма ўстойлівага старэння непасрэдна звязана з місіяй Еўрапейскага рымскага ўніверсітэта – спрыяць развіццю чалавека на кожным этапе яго існавання.
Для студэнтаў гэты дыялог паміж нобелеўскімі лаўрэатамі і філосафамі стане жывым прыкладам “адкрытага інтэлекту”, здольнага спалучаць вузкую спецыялізацыю з адзінствам ведаў.
