Святы Пасад у ААН: мір без ядзернага страху
Аляксандр Амяльчэня - Vatican News
Падчас адзінаццатай Канферэнцыі па разглядзе дзеяння Дагавора аб нераспаўсюджванні ядзернай зброі ў Нью-Ёрку прадстаўнікі Святога Пасада выступілі з праграмнай заявай. Галоўны пасыл дыпламатыі Касцёла – неабходнасць пераадолення мадэлі бяспекі, якая трымаецца на страху, пагрозе сілай і ўзаемнай уразлівасці.
Сённяшняя логіка супрацьстаяння ў сусветнай палітыцы толькі паглыбляе нестабільнасць, у той час як велізарныя рэсурсы, неабходныя для ўстойлівага развіцця чалавецтва, марнуюцца на нарошчванне ядзернай моцы і мадэрнізацыю арсеналаў.
Асобную трывогу выклікае імклівае ўкараненне штучнага інтэлекту ў ядзерныя сістэмы. Тэхналогіі, якія здольныя прымаць рашэнні замест чалавека, нясуць у сабе глыбокія этычныя і экзістэнцыяльныя рызыкі, паколькі яны скарачаюць час на роздум у крызісныя моманты і павялічваюць верагоднасць памылковай эскалацыі.
Менавіта таму Святы Пасад заклікае ўсе дзяржавы далучыцца да Дагавора аб забароне ядзернай зброі, каб пабудаваць будучыню на падмурку даверу і дыялогу, а не на застрашванні, якое пагражае знішчэннем усяму чалавецтву.
