Пантыфік сустрэнецца з удзельнікамі Юбілею сінадальных груп
Аляксандр Панчанка - Vatican News
Падзея стане важным этапам рэалізацыі накірункаў, вызначаных у Выніковым дакуменце XVI Звычайнай Асамблеі Сінода Біскупаў, паведамляе Генеральны сакратарыят Сінода.
Мерапрыемства аб’яднае каля двух тысяч удзельнікаў – членаў сінадальных груп і органаў удзелу (прэзбітэральных, душпастырскіх, эканамічных саветаў), якія дзейнічаюць па ўсім свеце на дыяцэзіяльным або епархіяльным, нацыянальным і міжнародным узроўнях.
24 кастрычніка пройдзе цырымонія адкрыцця юбілейнай сустрэчы, падчас якой прагучаць даклады, прысвечаныя сінадальнасці і неабходнасці змянення стылю ўзаемаадносін у Касцёле. Сярод выступоўцаў будзе польскі кардынал Гжэгаж Рысь, арцыбіскуп Лодзі.
Да ўдзельнікаў сустрэчы далучыцца Папа, у прысутнасці якога прадстаўнікі розных рэгіёнаў свету прадставяць справаздачы аб выкліках і зменах, уведзеных для ажыццяўлення сінадальнасці ў мясцовых Касцёлах. Чакаецца, што Святы Айцец адкажа на іх пытанні. У перапынках паміж размовамі прагучаць музычныя творы ў выкананні айца Крыстабаля Фонэса, езуіта, музыканта і старшыні Папскай сусветнай сеткі малітвы.
25 кастрычніка ўдзельнікі Юбілею пройдуць праз Святую Браму ватыканскай Базілікі святога Пятра, пасля чаго на працягу дня будуць дзяліцца сваім досведам і добрымі сінадальнымі практыкамі ў групах, падзеленых паводле моўнага прынцыпу. Пасля заключнай агульнай сесіі яны збяруцца на малітоўнае марыйнае чуванне на Плошчы Святога Пятра.
Завершыцца Юбілей сінадальных груп і органаў удзелу ўрачыстай святой Імшой, якую Папа Леў XIV будзе цэлебраваць раніцай 26 кастрычніка ў Базіліцы Святога Пятра.
