Новыя гвардзейцы прысягнулі ў прысутнасці Пантыфіка
Аляксандр Амяльчэня - Vatican News
У суботу, 4 кастрычніка 2025 года, у другой палове дня на двары святога Дамасія ў Апостальскім палацы адбылася гістарычная цырымонія. Леў XIV стаў першым за 57 гадоў Пантыфікам, які асабіста прысутнічаў на прысязе, апошні раз гэта адбылося падчас пантыфікату Паўла VI у 1968 годзе. Дваццаць сем навабранцаў прынеслі ўрачыстую клятву на новым сцягу, на якім герб Папы Францішка быў заменены на герб дзеючага Пантыфіка.
Святы Айцец у сваёй прамове падзякаваў гвардзейцам за іх службу, падкрэсліўшы, што яна з’яўляецца важным сведчаннем для сучаснай моладзі пра каштоўнасць дару жыцця, служэння і ахвярнасці. Самі ж рэкруты пакляліся “верна, аддана і пачэсна” служыць Папу і яго наступнікам, ахвяруючы, калі спатрэбіцца, нават уласнае жыццё дзеля іх абароны.
Дата сёлетняй прысягі была перанесена са звычайнага 6 мая – гадавіны гераічнай абароны Пантыфіка ў 1527 годзе – з прычыны смерці Папы Францішка і наступнага канклаву.
Ва ўрачыстасці, якой папярэднічала Імша пад кіраўніцтвам кардынала-дзяржсакратара П’етра Параліна, прыняла ўдзел таксама прэзідэнт Швейцарыі Карын Келер-Зутэр.
