Культурная дыпламатыя ў Ватыканскай бібліятэцы
Аляксандр Амяльчэня - Vatican News
Арцыбіскуп Джавані Чэзарэ Пагацы, Архіварыус і Бібліятэкар Святога Рымскага Касцёла, прэзентаваў вынікі працы па рэстаўрацыі і дыгіталізацыі рукапісаў. Праект ажыццяўляецца ў рамках пагаднення з Фондам Гейдара Аліева і Азербайджанскай акадэміяй навук.
Ужо ў 2013-2014 гадах дзякуючы гэтаму партнёрству былі адрэстаўраваны і алічбаваны 75 манускрыптаў, важных для цюркскай і азербайджанскай культурнай спадчыны. Мэтай далейшага ўзаемадзеяння з'яўляецца забеспячэнне доступу навукоўцаў да рэдкіх рукапісаў, карт і публікацый для вывучэння гісторыі краіны.
Ватыканская бібліятэка, заснаваная ў XV стагоддзі, і Апостальскі архіў з'яўляюцца аднымі з найважнейшых сусветных сховішчаў ведаў. Яны захоўваюць мільёны кніг, рукапісаў і афіцыйных дакументаў Апостальскай Сталіцы, даступных для даследчыкаў.
На заканчэнне візіту Мехрыбан Аліева перадала ў дар Бібліятэцы камплект выданняў, прысвечаных гісторыі, прыродзе і культурнай спадчыне Азербайджана, умацоўваючы культурны дыялог.
