Прэфект Фернандэс раскрыў сэнс дакумента пра Марыю

Аляксандр Амяльчэня - Vatican News

Падчас прэзентацыі дактрынальнай ноты “Mater Populi fidelis” (“Маці вернага люду”) у Рыме кардынал Віктар Мануэль Фернандэс патлумачыў яе асаблівае значэнне.

Слова “дактрынальная” ў назве паказвае, што нота мае вышэйшую вагу за іншыя дакументы, апублікаваныя за апошнія гады. Паколькі яна падпісана Папам Львом XIV, яе змест з’яўляецца часткай звычайнага навучання Касцёла і павінен брацца пад увагу ўсімі даследчыкамі марыялогіі.

Нота сканцэнтравана не столькі на тытулах, колькі на адносінах Марыі з намі, на Яе мацярынстве

Прэфект Дыкастэрыі веравучэння падкрэсліў, што галоўная тэма ноты – гэта мацярынства Марыі ў адносінах да вернікаў. Яно разглядаецца ў двух вымярэннях: “мацярынская блізкасць, якая праяўляецца вельмі разнастайным чынам” і “мацярынскае заступніцтва, якое заўсёды нас суправаджае”. Кардынал Фернандэс зазначыў, што “няма патрэбы вынаходзіць іншыя канцэпцыі, каб падкрэсліць канкрэтнае значэнне Марыі ў нашым жыцці”.

Аргенцінскі іерарх таксама раскрыў, што глыбокі аналіз гэтых пытанняў праводзіўся яшчэ ў часы, калі дыкастэрыю ўзначальваў кардынал Ёзэф Ратцынгер (1982-2005 гады). Аднак вынікі таго даследавання не былі апублікаваныя, хаця, як сказаў кардынал Фернандэс, “яго асноўныя палажэнні былі пацверджаны прэфектам Ратцынгерам у пазнейшай кнізе”.

Мы хочам вучыцца ў простых вернікаў іх свежаму даверу і жывой любові да Панны і Маці

Новы дакумент быў названы “гімнам народнай марыйнай пабожнасці, якая заўсёды чэрпае ад Багародзіцы прыняцце, заахвочванне, пяшчоту і надзею”.

Прэфект назваў гэтую пабожнасць сапраўдным скарбам. “Мы не хочам асуджаць простых хрысціян як вернікаў другой катэгорыі за тое, што яны не скончылі тэалагічных курсаў або не ўдзельнічаюць у структурах Касцёла. Замест гэтага мы хочам вучыцца ў іх свежаму даверу, здольнасці давяраць без ваганняў, жывой пяшчоце іх спантаннай любові да Панны і Маці”, - падсумаваў кардынал Віктар Мануэль Фернандэс.