Даведнік “Annuario Pontificio” цяпер у лічбавым фармаце
Марыя Валодзіна - Vatican News
Гэты крок здымае лагістычныя абмежаванні друкаванага выдання і робіць афіцыйныя даныя Святога Пасада даступнымі ў любым месцы і ў любы час – праз браўзер або мабільны дадатак.
Праект, рэалізаваны Дзяржаўным сакратарыятам і Дыкастэрыяй па камунікацыі, быў прадстаўлены Льву XIV, які асабіста наведаў новы партал. “Гэта будзе вельмі карысна для тых, хто працуе на службе Касцёлу”, - адзначыў ён.
Лічбавы праект прадставілі арцыбіскуп Эдгар Пэнья Пара, Субстытут Дзяржаўнага сакратара па агульных пытаннях, і айцец Люсіа Адрыян Руіс, сакратар Дыкастэрыі па камунікацыі. Святы Айцец наведаў платформу і азнаёміўся з яе працай. Ён падзякаваў прысутным і заклікаў працягваць “у духу служэння, каб тое, што нараджаецца з клопатам і ўвагай, з часам стала яшчэ большай дапамогай”.
Кола карыстальнікаў
Мэтай лічбавай версіі даведніка “Annuario Pontificio” з’яўляецца забеспячэнне простага і надзейнага доступу да афіцыйнай інфармацыі для шырокага кола карыстальнікаў: супрацоўнікаў дыкастэрый Рымскай курыі, апостальскіх нунцыятур, біскупскіх канферэнцый, рэлігійных інстытутаў, Папскіх універсітэтаў, даследчых цэнтраў, акадэмічных устаноў і журналістаў.
Хуткае абнаўленне і шырокі пошук
Новая платформа дазваляе аператыўна абнаўляць інфармацыю пра прызначэнні і змены ў касцёльных структурах. Калі раней даводзілася чакаць новага гадавога выпуску, сёння змены будуць адлюстроўвацца на платформе ў самы кароткі час адразу пасля афіцыйнага паведамлення. Сістэма пашыранага пошуку дае магчымасць знаходзіць даныя па імені, дыяцэзіі, пасадзе, краіне і інстытуцыйнай прыналежнасці.
Перспектывы развіцця
Стварэнне лічбавага “Annuario Pontificio” стала вынікам супрацоўніцтва Дзяржаўнага сакратарыята, які каардынаваў праект і сфармуляваў асноўныя патрабаванні; Дыкастэрыі па камунікацыі, якая займалася тэхнічнай распрацоўкай платформы, баз даных і нармалізацыяй інфармацыі; Цэнтральнай статыстычнай службы Касцёла; і маладых спецыялістаў у галіне дызайну.
Плануецца, што платформа будзе паступова пашырацца: у яе дададуць гістарычныя даныя з архіваў і папярэдніх выданняў, а таксама новыя выпускі. Карыстальнікаў запрашаюць дасылаць заўвагі і прапановы на адрас: annuariopontificio@sds.va.
Доступ і падпіска
Лічбавы дапаможнік можна знайсці на сайце https://www.annuariopontificio.catholic/ і ў мабільных дадатках для iOS і Android, якія можна будзе загрузіць у Apple Store і Google Play Store. Для карыстання неабходная рэгістрацыя і падпіска: прапануюцца два тарыфныя планы, якія гарантуюць пастаянны доступ і штодзённае абнаўленне даных.
