Кардынал Паралін пра заняпад каталіцкіх клінік і выхад з крызісу
Аляксандр Амяльчэня - Vatican News
Кардынал Дзяржсакратар П'етра Паралін, які адначасова з'яўляецца старшынёй Папскай камісіі па справах дзейнасці ў сферы аховы здароўя публічных юрыдычных асоб Касцёла, накіраваў пасланне з нагоды падпісання ўстаноўчага акта новага аб'яднання.
Гэтая падзея, якая адбылася ў ватыканскім палацы Сан-Каліста ў Рыме, азначае рашучы крок наперад у барацьбе з эрозіяй каталіцкай медыцынскай маёмасці. Паводле слоў іерарха, далейшае бяздзейнае назіранне за заняпадам гэтай духоўнай і грамадскай спадчыны было недапушчальным.
Новая структура яднае найбуйнейшыя каталіцкія шпіталі Італіі для сумеснай працы
Сітуацыя ў італьянскім сектары аховы здароўя, што знаходзіцца пад апекай Касцёла, патрабавала неадкладнага ўмяшання. Кардынал Паралін нагадаў, што Папская камісія была створана больш за дзесяць гадоў таму менавіта з прычыны цяжкага становішча шматлікіх структур, праблемы якіх часта вырашаліся праз іх адчужэнне. Гістарычны досвед і аналіз прычын крызісу падштурхнулі да стварэння кансорцыума "Сем хлябоў", які павінен забяспечыць эфектыўнае кіраванне пры захаванні харызмы заснавальнікаў.
Маштаб сектара ўражвае: гаворка ідзе пра амаль 300 устаноў, больш за 50 тысяч супрацоўнікаў і звыш 11 тысяч акрэдытаваных ложка-месцаў, што складае больш за 5 працэнтаў ад агульнанацыянальнага паказчыка Італіі.
Выбар менавіта кансорцыумнай формы дазваляе захаваць аўтаномію кожнай асобнай клінікі, адначасова забяспечваючы "ідэнтыфікацыйную інтэграцыю" на прасторы ад Бальцана да Сіцыліі.
Асноўнымі прыярытэтамі дзейнасці стануць устойлівасць і інавацыйнае развіццё
Шлях да нараджэння новай арганізацыі быў няпростым. Дзяржсакратар прызнаў існаванне супраціву і перашкод як унутры Касцёла, так і па-за яго межамі. Аднак менавіта гэтыя выпрабаванні, паводле яго думкі, сталі перадумовай для будучай “плоднасці”, на якую намякае сама назва таварыства.
Дырэктар Папскай камісіі ксёндз Марка Беладэлі ў інтэрв'ю медыя Святога Пасада патлумачыў, што "Сем хлябоў" стане кропкай апірышча ў адносінах з дзяржаўнымі інстытутамі, у прыватнасці з Міністэрствам аховы здароўя.
Асноўнай праблемай застаецца менеджмент: сярэднія і малыя ўстановы часта не маюць кадраў, здольных адказаць на сучасныя выклікі. Выйсце бачыцца ў стварэнні сеткі ўзаемадапамогі і салідарнасці, дзе кожны ўдзельнік будзе адчуваць падтрымку супольнасці.
На думку ксяндза Беладэлі, менавіта здольнасць "працаваць у сетцы" стане ключом да выжывання італьянскай каталіцкай медыцыны ў будучыні.
