Святы Пасад: штучны інтэлект і будучыня чалавечых стасункаў
Аляксандр Амяльчэня - Vatican News
Форум, які ладзіцца ў супрацоўніцтве з Дыкастэрыяй па культуры і адукацыі і Фондам святога Яна XXIII, з’яўляецца пляцоўкай для глыбокага аналізу ўплыву найноўшых тэхналогій, якія ўплываюць на грамадства. Ён аб’яднаў вядомых навукоўцаў, міжнародных экспертаў у галіне высокіх тэхналогій і журналістаў.
Папскі ўніверсітэт стаў прасторай для інтэнсіўнага абмену думкамі і практычным вопытам. Канферэнцыя аб’яднала розныя падыходы – ад тэалагічнага і філасофскага да тэхнічнага – дзеля сумеснай працы над этычнымі стандартамі лічбавага веку.
На думку даследчыкаў, алгарытмы здольны навязваць грамадству пэўны светапогляд, паколькі яны часта капіруюць і тыражуюць стэрэатыпы ды прадузятасць, прысутныя ў зыходных базах даных.
Асобная ўвага на канферэнцыі надаецца пошуку магчымага альянсу паміж чалавекам і лічбавымі інавацыямі. Удзельнікі падкрэсліваюць, што задача грамадства – не спыніць тэхналагічны прагрэс, а навучыцца мудра кіраваць ім дзеля абароны годнасці кожнай асобы.
Спецыялісты ў розных сферах пагаджаюцца з тым, што менавіта развіццё медыяпісьменнасці і здольнасці да крытычнай рэфлексіі праз сістэму адукацыі з’яўляюцца найважнейшай абаронай чалавечага розуму і незалежнага мыслення перад тварам глабальнай лічбавізацыі.
